Joriy yilning 29-sentyabr — 2-oktyabr kunlari yurtimizda navbatdagi, “Ipak yo‘li durdonasi” XV Toshkent Xalqaro kinofestivali o‘tkaziladi. Festivalda “Taksi” franshizasi yulduzi — Daniyel, yaʼni Sami Naseri ham ishtirok etadi. Bu haqda kinofestival tashkilotchilari xabar berdi.
Qayd etilishicha, kinofestival davomida Sami Naseri bilan ijodiy uchrashuv ham o‘tkazilishi rejalashtirilgan.
“Taksi”ning birinchi qismi 1998-yilda suratga olingan bo‘lib, u vaqtda aktyor 37 yoshda bo‘lgan.
Bo‘lajak aktyor 16 yoshida maktabni tashlab, ishlashga kirishgan. Uzoq vaqt davomida sahnada o‘zini topishga harakat qilgan Sami ilk bor 1995-yilda rejissor Tom Jilning “Jannat” filmida rol ijro qiladi.
Keyin esa Lyuk Bessonning mashhur “Leon” filmida shlem kiygan politsiyachilardan birining rolini gavdalantiradi. 2006-yilda suratga olingan “Patriotlar” filmidagi Yassir roli uchun “Eng yaxshi erkak aktyor” deb topiladi.
2000-yildan boshlab aktyor hayotida turli o‘zgarishlar yuz bera boshlaydi. 2003-yilda mast holda mashina haydagan Sami haydovchi bilan mushtlashgani sabab 6000 yevro jarima to‘lab, uch yilga haydovchilik guvohnomasidan ayriladi.
2005-yilda esa Von Dutch firmasi stilistini kaltaklagani sabab ikki oyga ozodlikdan mahrum qilinadi. 2008-yilda haydovchilik guvohnomasidan ayrilganiga qaramasdan mashina haydab, politsiya xodimini urib yuboradi va oqibatda 7500 yevro jarima to‘lab, olti oy ozodlikdan mahrum qilinadi va alkogoldan qutulish uchun davolovchi kurslarga yozilishga majbur bo‘ladi.
Bundan tashqari, 2018-yilda Moskvadagi karaoke-barlardan birida Belarus fuqarolari bilan mushtlashib, yana bir marta politsiyaga tushadi. Bu kabi voqealar uning karyerasiga ham ta’sir o‘tkazmay qolmaydi.
Izoh (0)