O‘zbek tomoshabinlarining sevimli filmlari qatoridan joy olgan “Bobbi” filmining final sahnasida yosh Dimpl Kapadiyaning qo‘llaridagi nikoh xinasini yashirishning iloji bo‘lmagan. Raj Kapurning blokbasteri ekran yuziga chiqishidan avvalroq bosh qahramonni gavdalantirgan o‘smir qizaloq, o‘zidan 16 yosh katta bo‘lgan Rajesh Khannaga turmushga chiqib ulgurgan edi.
Erta karyera va erta turmush
Dimpl Kapadiya 1957-yil 8-iyunda Bombeyda dunyoga kelgan. Tug‘ilganida Amina deb ism qo‘yilganiga qaramay, yuzida kulgichi borligi sabab qizaloqni Dimpl deb chaqirishgan. U oilada 4 nafar farzandning to‘ng‘ichi bo‘lgan. Dimpl Raj Kapurning “Bobbi” (1973) filmida suratga tushish uchun tasdiqlangan. Uning Rajesh Khanna bilan samolyotdagi parvoz vaqtida tanishgani aytiladi. Yasir Usmanning “Rajesh Khanna: Hindistonning eng katta superyulduzi” kitobida yozilishicha, aktyor Dimplni bir ko‘rishdayoq sevib qolgan. Bir necha yil uchrashib yurgan qaylig‘i Anju Maxendra bilan munosabatlariga chek qo‘ygan Rajesh 15 yoshli qiz bilan hayotini bog‘lashni afzal bilgan. Turmush qurganlaridan 6 oy o‘tib, “Bobbi” ekran yuzini ko‘rgan va Dimpl eng yaxshi aktrisa sifatida Filmfare Award’ni qo‘lga kiritgan.
O‘zligini yo‘qotishdan qo‘rqqan aktrisa
Dimpl oilali bo‘lganidan keyin avvalgidek erki o‘ziga bog‘liq bo‘lmay qolgan. Zamonaviy kalta liboslar o‘rniga shifon matosidan tikilgan sari kiya boshlagan. Kayfiyati va o‘zini tutishi ham qizlik vaqtidagidan farq qila boshlagan. Ko‘p o‘tmay yoshida sezilarli farq bo‘lgan juftlik munosabatlarida darz ketish kuzatilgan. Rajeshning mashhurlikni qo‘ldan boy berib, spirtli ichimliklarga ruju qo‘ygani, shuningdek, qo‘pol munosabatda bo‘lishi hali yosh va beg‘ubor bo‘lgan Dimplga og‘ir botgan. Aktrisa 1982-yilda 8 va 4 yoshli qizlari Tvinkl va Rinka bilan uydan chiqib ketgan.
“Biz Rajesh bilan uzoq vaqt davomida turmushimizning barbod bo‘lganiga ko‘nika olmadik. Ammo men u bilan qancha uzoq qolsam, o‘zligimni shuncha ko‘p yo‘qotishimni tushunib yetdim. Men uning tabassumini ko‘rish uchun hamma narsa qilishga tayyor edim”, — degan u India Today nashriga bergan intervyusida. 10 yillik turmushidan keyin bir olam hayotiy tajriba bilan kinoolamiga qayta qadam tashlagan Dimpl “Ishonch” (1985), “Kibr” (1993) hamda “Chorasizlik” (1993) singari filmlarda muvaffaqiyatli rollarni ijro qilgan.
Dimpl o‘xshamagan turmushi, ikki nafar singlisi va ukasining vafotidan saboq olib ulgurgan edi. “Hayotimning butun hikoyasi yuzimda o‘z aksini topgan. Unda beg‘uborlik ham, sipolik ham yo‘q. Undan ko‘p narsani bilish mumkin”, — degan u India Today’ga bergan intervyusida. Rejissor Mrinal Sen uni Sofi Loren bilan solishtirib, yuzini “huvullagan manzara”ga o‘xshatganda Feroz Xon: “Hech bir boshqa qizda bu qadar agressiya namoyon emas”, — degan. Hatto sochidagi erta oralagan oqlar ham boshidan kechirgan davrlaridan mag‘rurona eslatmadek edi go‘yo.
Ikkinchi urinish
Dimpl katta ekranlarga “Sevgi dengizi” (1984) filmidagi roli bilan qaytgan. 1985-yilda premyerasi bo‘lgan filmdan keyin Dimlp Filmfare mukofotiga eng yaxshi aktrisa sifatida loyiq deb topilgan. Maxesh Bxattning “Koshki”(1987) nomli filmi aktrisaga haqiqiy mashhurlik keltirgan. “Men Dimplni u gavdalantirgan qahramon Pujidan farqlay olmayman. U hayotida ko‘p narsalarni boshdan o‘tkazgan”, — degan film rejissori Bxatt.
“Kibr” (1993) filmidagi ijrosi ortidan esa Milliy mukofotni qo‘lga kiritgan. 2020-yilda aktrisa Kristofer Nolanning “Dalil” nomli trillerida ham suratga tushgan. “Bu o‘zimga ishonishga majbur qildi”, — deydi u. 2021-yilda esa Ali Abbos Zafarning “Tandav” deb nomlangan serialida ishtirok etgan. Kelajakdagi loyihalari orasida Ayan Mukerjining “Braxmastra” fentezisi hamda Dinesh Vijanning hali nomi ma’lum bo‘lmagan komediyasi bor.
Yaxshi rafiqa
Vaqt o‘tishi bilan Dimpl va Rajeshning munosabatlari iziga tusha boshlagan. Xafagarchilik va ginaning o‘rnini o‘zaro hurmat egallay boshlagan. Undan nima uchun ikkinchi marta turmushga chiqmasligi haqida so‘ralganda: “Men juda ham baxtliman va hayotimdan mamnunman. Qayta turmush qurishning nima keragi bor? Bir martasi shundoq ham yetarli bo‘lgan”,— degan.
Izoh (0)