“Taksi” filmining eng esda qolarli qahramonlaridan biri komissar Jiber rolini fransuz aktyori Bernar Farsi ijro etgan. Quyida taniqli aktyorning hayot va ijod yo‘liga nazar tashlaymiz.
Bernar Farsi 1949-yilning 17-martida Fransiyaning Lion shahrida tug‘ilgan. Uning oilasi harbiylardan iborat bo‘lib, teatr va kino olamidan uzoqda edi. Farsi bolaligidanoq san’atga qiziqa boshlagan. U musiqa va raqs milliy konservatoriyasida o‘qiy boshlagan, keyinchalik uni tashlab qo‘ygan. Bernar Reymsdagi teatr maktabini tamomlab, Parijga borgan.
Farsi aktyor sifatidagi ilk qadamlarini Monparnas teatrida tashlagan. Farsi bu yerda ikkinchi darajali rollarni ijro etgan. Bir vaqtning o‘zida u kasting va kinosinovlarga borib, filmlarda roller ijro etishga ham harakat qilgan. Farsiga ko‘plab kinostudiyalar rad javobini berardi. Sababi uning tashqi ko‘rinishi o‘sha paytdagi Fransiya kinematografi talablariga mos kelmasdi.
Farsining ijodiy yuksalishi 80-yillarga to‘g‘ri keladi. O‘shanda u fransuz rejissorlari tomonidan suratga olingan ko‘plab kinofilmlarda suratga tusha boshlagan. 1983-yilda Bernarga “Oy aksi” deb nomlangan filmda suratga tushishni taklif qilishgan. Yosh aktyor kartina personajlari orasida e’tiborga tushmagan bo‘lsa-da, Farsi fransuz kinosining yulduzlari bilan bitta maydonchada ishlashga muvaffaq bo‘ldi.
2000-yillar Bernarning filmografiyasi yorqin loyihalar bilan boyidi. U aktyor sifatida o‘zini ham dramatik, ham komedik rollar bilan sinab ko‘rdi. 2001-yilda “Bo‘ri qardoshligi” trilleri ekranlarga chiqdi. Film tomoshabinni 18-asrga Fransiya janubida yuz berayotgan vahshiy qotilliklar olamiga sho‘ng‘ishga undaydi. Ushbu filmda Bernar bilan birgalikda Vensan Kassel, Monika Belluchchi kabi taniqli aktyorlar suratga tushgan. Monika Belluchchi bilan birgalikda aktyor “Asteriks va Obeliks: Kleopatra missiyasi” kartinasida ham birga ishlagan.
“Taksi”
Farsiga haqiqiy shon-shuhrat Lyuk Bessonning “Taksi” filmi orqali keldi. Filmining birinchi qismi 1998-yilda efirga uzatilgan bo‘lib, Farsi unda komissar Jiber rolini ijro etgan. Pitsseriyaning sobiq kuryeri Daniel va omadsiz politsiyachi Emilyenning kulgili sarguzashtlari haqidagi kartina nafaqat Fransiya, balki butun dunyoda mashhurlikka erishdi.
Shaxsiy hayot
Bernar Farsining shaxsiy hayoti haqida ma’lumotlar mavjud emas. Aktyor na rafiqasi va na farzandlari haqida ommaga hech qanday ma’lumot bermaydi. Jurnalistlar Bernardan shaxsiy hayoti haqida bir necha marta so‘ragan, ammo aktyor intervyularida faqat teatr va kino haqida gapirishni afzal ko‘rgan. Farsi ijtimoiy tarmoqlardan foydalanmaydi, shuning uchun u hozirda qanday hayot kechirishi haqida ma’lumotlar mavjud emas.
Bernar hozirda ham filmlarda suratga tushishda davom etmoqda. Aktyorning muxlislari uning 2023-yilda keksa er-xotinlarning hayoti haqidagi filmda suratga tushganini eshitib, xursand bo‘lishlari aniq.
Izoh (0)