Qamchiq dovonidan o‘tuvchi xalqaro ahamiyatdagi A-373 avtomobil yo‘lining 221-kilometridagi “Ohangaronsoy” ko‘prigida taʼmirlash ishlari boshlangandi. Bu haqda IIV YHXX axborot xizmati xabar berdi.
Shu munosabati bilan mazkur yo‘lning Toshkent—Vodiy yo‘nalishi vaqtincha yopilib, yo‘lning Vodiy—Toshkent yo‘nalishi beton to‘siqlar yordamida ikkiga ajratilgan va ushbu tomonda qarama-qarshi yo‘nalishlar tashkil etilgan.
Haydovchilarni ogohlantiruvchi va ularga yo‘nalishlarni ko‘rsatuvchi hamda harakat xavfsizligini taʼminlaydigan tegishli belgilar o‘rnatilgan.
Shuningdek, tungi vaqtda ham xavfsizlikni taʼminlash maqsadida vaqtincha tashkil etilgan yo‘nalishlarga chiroqlar o‘rnatilib, yo‘nalish ko‘rsatuvchi belgilarni ham yoritish choralari ko‘rilgan.
“Barcha haydovchilardan ko‘prik taʼmirlanayotgani sababli tashkil etilgan chora-tadbirlarni to‘g‘ri tushunushlarini, mazkur joydan harakatlanib o‘tishda tartibga soluvchilarning ishoralariga, yo‘l belgilari va chiziqlarining talablariga rioya etgan holda, tezlikni oshirmasdan, ehtiyotkorlik bilan harakatlanishlarini so‘raymiz”, — deyiladi xabarda.
Iyul oxirlarida Qamchiq dovonidan o‘tuvchi avtomobil yo‘lida harakat qisqa muddatga cheklangandi. Bunga Mudofaa hamda Favqulodda vaziyatlar vazirliklari tomonidan rejali o‘quv mashg‘uloti o‘tkazilgani sabab bo‘lgan edi.
Izoh (0)