Surxondaryo viloyati Sariosiyo tumanida kuzatilgan sel oqibatida aholi punktlarini bog‘lovchi tog‘li dovon yo‘li yopilib qoldi. Bu haqda FVV matbuot xizmati xabar berdi.
Ma’lum qilinishicha, 7-iyul kuni soat 14:20 atrofida Sariosiyo tumani tog‘li hududida qisqa muddatli kuchli yomg‘ir yog‘ishi sababli sel oqimlari kelishi hodisasi kuzatilgan. Oqibatda tumanning “Xo‘jaasmin” va “Chosh” aholi yashash punktlarini bog‘lovchi tog‘li dovon avtomobil yo‘liga katta harsangtoshlar va loyqalar tushib, dovon yo‘li yopilib qolgan. Mazkur yopilib qolgan dovon yo‘lida 3 ta yengil “UAZ” rusumli avtomobil va 8 nafar fuqaro harakatsiz qolib ketgan.
Zudlik bilan hodisa joyiga viloyat Favqulodda vaziyatlar boshqarmasi va uning hududiy bo‘limi xodimlari yetib borib, tuman hokimligi, Ichki ishlar bo‘limi va “Xondiza” kon boyitish boshqarmasi mas’ul xodimlari hamkorligida, maxsus texnikalar yordamida dovon avtomobil yo‘li katta xarsangtosh va loyqalardan tozalangan.
Qayd etilishicha, avtomobil qatnovi yo‘lga qo‘yilib, 8 nafar fuqaroga amaliy yordam ko‘rsatilgan. Hodisa oqibatida tan jarohati olgan va halok bo‘lganlar yo‘q.
Sel xavfi
2022-yil may oyida Surxondaryoda 40 ga yaqin xonadonni sel bosib, 230 dan ortiq kishi evakuatsiya qilingandi. Shuningdek, Sirdaryoda suv toshqini oqibatida 2 ta ko‘p qavatli uy butunlay yaroqsiz holga kelgani, Jizzaxda sel oqimida qolib ketgan ikki fuqaro ichki ishlar xodimlari tomonidan qutqarilgani to‘g‘risida xabar berilgandi.
Bundan tashqari, o‘tgan yili Qamchiq dovonida sel tufayli poyezdni elektr quvvati bilan ta’minlovchi ustun qulab tushgan edi. Yuzaga kelgan vaziyat oqibatlarini bartaraf etish maqsadida tezkor shtab tuzilib, Qamchiq MQYOQB va “O‘zbekiston temiryo‘llari” AJ maxsus avariya-tiklash brigadasi va muhandislik texnikalari bilan yo‘lda ta’mirlash ishlari olib borilib, elektr tayanch ustuni hamda yo‘l ostidan qo‘shimcha sel o‘tkazgich qurish ishlari amalga oshirilgan.
Izoh (0)