Қамчиқ довонидан ўтувчи халқаро аҳамиятдаги А-373 автомобиль йўлининг 221-километридаги “Оҳангаронсой” кўпригида таъмирлаш ишлари бошланганди. Бу ҳақда ИИВ ЙҲХХ ахборот хизмати хабар берди.
Шу муносабати билан мазкур йўлнинг Тошкент—Водий йўналиши вақтинча ёпилиб, йўлнинг Водий—Тошкент йўналиши бетон тўсиқлар ёрдамида иккига ажратилган ва ушбу томонда қарама-қарши йўналишлар ташкил этилган.
Ҳайдовчиларни огоҳлантирувчи ва уларга йўналишларни кўрсатувчи ҳамда ҳаракат хавфсизлигини таъминлайдиган тегишли белгилар ўрнатилган.
Шунингдек, тунги вақтда ҳам хавфсизликни таъминлаш мақсадида вақтинча ташкил этилган йўналишларга чироқлар ўрнатилиб, йўналиш кўрсатувчи белгиларни ҳам ёритиш чоралари кўрилган.
“Барча ҳайдовчилардан кўприк таъмирланаётгани сабабли ташкил этилган чора-тадбирларни тўғри тушунушларини, мазкур жойдан ҳаракатланиб ўтишда тартибга солувчиларнинг ишораларига, йўл белгилари ва чизиқларининг талабларига риоя этган ҳолда, тезликни оширмасдан, эҳтиёткорлик билан ҳаракатланишларини сўраймиз”, — дейилади хабарда.
Июль охирларида Қамчиқ довонидан ўтувчи автомобиль йўлида ҳаракат қисқа муддатга чекланганди. Бунга Мудофаа ҳамда Фавқулодда вазиятлар вазирликлари томонидан режали ўқув машғулоти ўтказилгани сабаб бўлган эди.
Изоҳ (0)