Prezident yordamchisi Saida Mirziyoyeva Xitoyda XIX Osiyo o‘yinlariga bag‘ishlangan “Rang-barang Osiyo: Osiyo liboslari ko‘rgazmasi”da ishtirok etdi.
“Xalqaro tadbirning dunyoga mashhur Ipak muzeyida o‘tkazilayotgani biz uchun, ayniqsa, qadrli. Chunki, hunarmandchilikning ushbu yo‘nalishi mamlakatlarimizni kamida uch ming yillik tarixi bilan birlashtirib turadi.
Ipak bilan savdo qilingan davrlarda bizni qalin diplomatik munosabatlar, madaniyat va texnologiyalar almashinuvi yanada yaqinlashtirdi. Bu esa Buyuk Ipak yo‘li bo‘ylab o‘zaro taraqqiyot va iqtisodiy farovonlikka xizmat qilgan. Anʼanalarimiz va asosiy qadriyatlarimiz o‘xshashligi ham balki shundandir.
Xitoylik do‘stlarimizga samimiy mehmondo‘stligi va o‘zbek madaniyatiga bo‘lgan qiziqishlari uchun minnatdorlik bildirmoqchiman. Ipakchiligimiz tarixi — umumiy madaniy merosimizning ajralmas qismi bo‘lib, mazkur ko‘rgazma buni namoyish etish uchun ajoyib imkoniyatdir”, — deb yozadi Saida Mirziyoyeva.
Samarqand muzey-qo‘riqxonasi va O‘zbekiston Davlat san’at muzeyi sara to‘plamlariga mansub 20 ta muzey eksponatini taqdim etilayotgan ko‘rgazma 12-noyabrga qadar davom etadi. Ko‘rgazmaga O‘zbekiston muzeylari sara to‘plamlaridan an’anaviy o‘zbek so‘zanalari, chopon va zargarlik buyumlari jo‘natilgan. Tashrif buyuruvchilar o‘zbekistonlik ustalar tomonidan tayyorlangan an’anaviy san’atning eng yaxshi namunalarini tomosha qilishlari mumkin.
Madaniyat va san’atni rivojlantirish jamg‘armasining ma’lum qilishicha, 26-sentabr kuni Xanchjou shahrida O‘zbekistonning boy madaniy va tarixiy merosiga bag‘ishlangan “O‘zbekiston oqshomi” bayrami bo‘lib o‘tgan.
Oqshom tadbiri doirasida an’anaviy o‘zbek gazlamalarini ishlab chiqarish jarayoni namoyish etilib, dasturning musiqiy qismidan esa mashhur “Bahor” davlat ansambli, “Maqom” ansambli va xalq artisti Abduhoshim Ismoilovlarning kuy va xonishlari o‘rin olgan.
Izoh (0)