Davlat xavfsizlik xizmati xodimlari tomonidan uchta viloyatda qalbaki valyutalarning muomalaga chiqarilishiga chek qo‘yildi, deb xabar beradi O‘zA.
Qayd etilishicha, Sirdaryo viloyatida hamkorlikda o‘tkazilgan tezkor tadbirda, Oqoltin tumanida yashovchi 25 yoshli shaxs aldov yo‘li bilan ikki nafar fuqaroning ishonchiga kirib, ulardan biriga 10 ming, ikkinchisiga esa 4 ming, jami 14 ming qalbaki dollarini o‘tkazmoqchi bo‘lgan vaqtida ushlangan.
Buxoro viloyatida kuzatilgan holatda esa G‘ijduvon tumanida yashovchi, muqaddam sudlangan 37 va 34 yoshli ikki shaxs xaridorga qalbaki 10 ming dollarini 5 ming dollariga sotishga kelishgan.
Davlat xavfsizlik xizmatining Buxoro viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda o‘tkazilgan tezkor tadbirda, ular qalbaki 8,3 ming dollarni berib va qolganini tez kunda yetkazishlarini aytib, 5 ming dollarni olgan vaqtlarida ushlangan.
Qalbaki pullar muomalasi
Bundan oldin Navoiy viloyati IIB TQX JQB, DXX Navoiy viloyati boshqarmasi va departament xodimlari bilan hamkorlikda o‘tkazilgan tezkor tadbirda jinoiy guruh tomonidan 400 million so‘m soxta pullar 160 million so‘m haqiqiy pullarga almashtirilayotgan paytda qo‘lga olingandi. Aprel boshlarida esa Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
2022-yil noyabrida Namangan viloyatida qalbaki 8 300 dollarni muomalaga kiritishga uringan shaxs ushlangan edi. Dekabrda esa Namanganda MIB idorasida qalbaki 10 000 dollar yoqib yuborilgan.
Izoh (0)