Toshkent shahri Yangihayot tumanida 27-mart kuni xaridor qalbaki pulga iPhone sotib oldi. Poytaxt Ichki ishlar bosh boshqarmasi axborot xizmati holat yuzasidan ma’lumot berdi.
Ma’lum bo‘lishicha, 26 yoshli N.Sh. iPhone 12 Pro telefonini 5 million 900 ming so‘mga sotishi haqida e’lon bergan. Tez orada ushbu e’longa notanish yigit qo‘ng‘iroq qilib, telefonni sotib olmoqchi ekanini ma’lum qilgan.
Fuqaro N.Sh. Yangihayot tumanidagi 3-metro bekati oldida joylashgan avtobus bekatida xaridor bilan uchrashishga kelishgan. Notanish yigit deyarli savdolashmay, kelishilgan pulni N.ga berib, telefonni olib ketgan. Fuqaro pullarni sanaganida bir nechta pullarning haqiqiyligiga shubhalangan va bu holatga oydinlik kiritish maqsadida Toshkent shahar IIBBga ariza bilan murojaat qilgan.
O‘tkazilgan tergovga qadar tekshiruv jarayonida N.dan 10 dona 200 000 so‘mlik va 5 dona 100 000 so‘mlik, jami 2 500 000 so‘m miqdoridagi pullar ashyoviy dalil sifatida olingan. Ushbu pul birliklarini aniqlash maqsadida Toshkent shahar IIBB Ekspert-kriminalistika markazi ekspertlari tomonidan ekspertiza o‘tkazilgan. Ekspertiza xulosasiga ko‘ra, ushbu pul birliklari qalbaki ekanligi aniqlangan.
Mazkur holat yuzasidan Yangihayot tumani ichki ishlar organi faoliyatini muvofiqlashtirish bo‘limi huzuridagi tergov bo‘limi tomonidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)