Navoiy viloyatining Qiziltepa tumanida soxta pul tayyorlash va o‘tkazishda gumonlanayotgan bir guruh shaxslar qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, Qiziltepa tumanida istiqomat qilayotgan asli buxorolik 30 yoshli Asliddin (ismlari o‘zgartirilgan) kompyuter texnologiyasi sohasidagi bilimlarini qalbaki pullar ishlab chiqarishga yo‘naltirgan.
Jinoiy to‘dada biri pullarni ishlab chiqarish, biri muomalaga kiritish yana biri yordamchi va haydovchilik qilishni bo‘yniga olgan. Ular 200 ming so‘mlik kupyurada jami 400 million so‘m pullarni tayyorlashga muvaffaq bo‘lgan.
Navoiy viloyati IIB TQX JQB, DXX Navoiy viloyati boshqarmasi va departament xodimlari bilan hamkorlikda o‘tkazilgan tezkor tadbirda jinoiy guruh tomonidan 400 million so‘m soxta pullar 160 million so‘m haqiqiy pullarga almashtirilayotgan paytda qo‘lga olingan.
Hozirda ularga nisbatan Jinoyat kodeksining 176-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.
Qalbaki pullar muomalasi
Aprel boshlarida Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
2022-yil noyabrida Namangan viloyatida qalbaki 8 300 dollarni muomalaga kiritishga uringan shaxs ushlangan edi. Dekabrda esa Namanganda MIB idorasida qalbaki 10 000 dollar yoqib yuborilgan.
Izoh (0)