“Insoniyat do‘zax eshiklarini ochdi” — BMT bosh kotibi

BMT bosh kotibi Antoniu Guterrish iqlim bo‘yicha sammitda insoniyat “jahannam eshiklarini ochgani” haqida gapirdi. Bu haqda ABC News xabar berdi.

Guterrish sammitdagi asosiy e’tibor iqlim yechimlariga qaratilgani, bu vazifa dolzarbligini qayd etdi.

“Insoniyat do‘zax eshiklarini ochdi. Dahshatli issiqlik dahshatli oqibatlarga olib keladi. G‘azablangan fermerlar ekinlarning suv toshqinlari oqibatida nobud bo‘layotgani, jazirama issiq kasalliklarni keltirib chiqarayotgani va minglab odamlarning qo‘rquv ichida yong‘inlardan qochishini kuzatmoqda. Iqlim o‘zgarishiga qarshi kurash muammo ko‘lami bilan solishtirganda zaifroq”, — dedi BMT bosh kotibi.

U hech narsa o‘zgarmasa, harorat 2,8 darajaga ko‘tarilib, “xavfli va beqaror dunyo”ga olib kelishi haqida ogohlantirdi. Guterrishning ta’kidlashicha, jahon hamjamiyati qazib olinadigan yonilg‘idan milliardlab daromad topayotganlarning “ochko‘zligi” tufayli yo‘qotilgan vaqtni qoplashi kerak.

“Taklif etilayotgan Iqlim birdamligi pakti qazib olinadigan yonilg‘idan ko‘proq foyda ko‘rgan eng yirik emitentlarni emissiyalarni kamaytirish uchun ko‘proq harakat qilishga va boy mamlakatlarni buning uchun rivojlanayotgan iqtisodlarni qo‘llab-quvvatlashga chaqiradi”, — dedi u.

Shuningdek, Guterrish iqlim o‘zgarishiga qarshi kurashayotgan faollar, qazib olinadigan yonilg‘idan voz kechish uchun muhim qadamlar qo‘yayotgan biznes rahbarlari, merlar va hukumatlarga minnatdorlik bildirdi.