“Dengiz sathi ko‘tarilishi tufayli davlatlar yer yuzidan yo‘q bo‘lib ketishi mumkin” — BMT bosh kotibi

BMT bosh kotibi Antoniu Guterrish dengiz sathining tez ko‘tarilishi oqibatida ayrim davlatlar suv ostida qolishi haqida gapirdi. Bu haqda tashkilot saytida xabar berildi.

Guterrish 14-fevral kuni BMT Xavfsizlik Kengashiga qilgan murojaatida bu haqda gapirdi. U XX asrda global dengiz sathi so‘nggi 3 000 yilda boshqa asrlarga qaraganda tezroq ko‘tarilganini ta’kidladi. Siyosatchi Bangladesh, Xitoy, Hindiston va Niderlandiya kabi davlatlar xavf ostida qolishini aytdi. Lagos, Maputu, Bangkok, Dakka, Jakarta, Mumbay, Shanxay, Kopengagen, London, Los-Anjeles, Nyu-York, Buenos-Ayres va Santyago kabi metropolitan hududlar og‘ir oqibatlarga duch kelishini ta’kidladi.

“Fidji, Vanuatu va Solomon orollari kabi ba'zi mamlakatlarda dengiz sathining ko'tarilishi allaqachon odamlarning ommaviy ko'chishiga olib kelgan. Shimoliy Afrikada sho'r suv tuproqqa singib, chuchuk suv bilan aralashib, ekinlarni nobud qiladi”, — deydi BMT bosh kotibi

Muammoni hal qilish uchun BMT rahbari uchta yo‘nalishda ishlashni taklif qildi:

• iqlim o‘zgarishiga qarshi kurashni davom ettirish va birinchi navbatda, karbonat angidrid chiqindilarini kamaytirish;
• qashshoqlik, tengsizlik, diskriminatsiya, inson huquqlarining buzilishi kabi ijtimoiy beqarorlik muammolarini hal qilish;
• dengiz sathining ko‘tarilishidan jabrlangan odamlarning huquqlarini himoya qilish uchun mavjud mexanizmlardan foydalanish va yangilarini yaratish.