Toshkentdagi “Yoshlar ijod saroyida” so‘nggi kunlarda ko‘plab shov-shuvlarga sabab bo‘layotgan, real voqealar asosida suratga olingan “Piramida” serialining premyerasi bo‘lib o‘tdi. “Daryo” nashri ijodkorlari serial taqdimotidan reportajni e’tiboringizga havola etadi.
“Piramida” — kriminal, detektiv janrda suratga olingan o‘zbek milliy seriali. Loyiha uch qismdan iborat, unda moliyaviy firibgarlikning ayanchli oqibatlari haqida hikoya qilinadi.
“Bu loyihaning boshqa loyihalardan farqi — qo‘rqmasdan qo‘l urilgan mavzusi borligida, aktyorlarni roliga, ichidagi dardiga qarab taklif qilinganida. Bu urinishlar, ikkilanishlar, tanqidlar, xatolar — juda yaxshi narsa. Agar shu tanqidlardan to‘g‘ri xulosa chiqarilsa, bu katta muvaffaqiyatga olib chiqadi. Muvaffaqiyatsizlikning yaxshi tomoni shundaki, albatta, yaxshi tomonga olib chiqadi. Bu jarayonlar har bir davlatdan, kompaniyadan o‘tgan. Xato qilishdan qo‘rqish kerak emas”, — deydi O‘zbekistonda xizmat ko‘rsatgan artist Boir Xolmirzayev.
Serialning birinchi faslida 50 dan ortiq aktyorlar va ommaviy sahnalar uchun 100 dan ortiq havaskorlar qatnashgan.
“Bu serialdagi rolim — Davlat xavfsizlik xizmati xodimi roli. U davlatga xiyonat qilayotgan insonlarga qarshi boradigan inson bo‘ladi. Bu rolni o‘ynaganimdan juda ham faxrlanaman, chunki o‘zim orzu qilgan rollardan biri.
Serialning bir sahnasida fermer xo‘jaligiga pul berkitib qo‘yilgan bo‘ladi. Havo sovuq, biz esa o‘sha yerni kavlashimiz kerak edi. Traktor ishlamay qoldi, keyin uni o‘zimiz kavladik. Kavlagandan keyin bir hafta ag‘anab yotib qoldim”, — deydi aktyor Axror Alijonov.
Loyihada mansabdor shaxslarning korrupsiyaga yo‘l qo‘yayotgani ham ochib berilgan. Umuman olganda, serial orqali aholining huquqiy savodxonligini oshirish, ogohlikka chorlash g‘oyasi ilgari surilgan.
“Serialdagi rolim bir qarashda salbiy ko‘rinishi mumkin, biroq har bir qism davomida uning haqiqatlari, kechinmalari ochib beriladi. Obrazimni yomon ishdagi yaxshi inson deb baholagan bo‘lardim. U qiyin vaziyatlarda ham yonidagi insonlarni tashlab ketmaydi, katta pul uchun ham o‘z sheriklarini sotmaydi”, — deydi Surat Islomov.
“Loyihada Rustam rolini ijro etganman. Serial Ahmadboy haqida, biz uning atrofidagi qo‘riqchilari bo‘lamiz. Ish qiyinchilik bilan, sovuq havoda suratga olish jarayonlarini davom ettirgan paytlarimiz ham bo‘ldi”, — deydi Asror Hamidov.
“Biz shu sohaning mutaxassislari bilan ishladik. Shu narsalarni ipidan ignasigacha o‘rgandik. Sport bilan shug‘ullandik. Serialni olishdan maqsad — ko‘pchilik biladi, O‘zbekistonda yirik moliyaviy piramida qurbonlari juda ham ko‘p bo‘lgan. Shuning prototipini olib, serial yaratdik.
Insonlar hali ham shu narsalarga aldanyapti. Uning har xil turlari bor: kimdir mashina, kimdir mol, kimlardir esa pul bilan shug‘ullanadi. Bu birinchi masala, ikkinchi masala, serial sanoatimizda qaynona, kelin munosabatlaridan nariga o‘tmay qoldik. Maqsad — mana shu narsani o‘zgartirish”, — deydi loyihada bosh rollardan birini ijro etgan aktyor Umid Soatov.
Serial premyerasidan tayyorlangan to‘liq reportajni quyida tomosha qilishingiz mumkin.
Izoh (0)