Hind kinoijodkorlari 1983-yilda Avstraliyaning “Edemga qaytish” seriali remeyki bo‘lgan “Qasos o‘ti”ni taqdim qilgan. Filmning yaratilishi haqidagi ma’lumotlar ko‘plab tomoshabinlar uchun qiziq bo‘lishi aniq.
Rekha Bollivudda mashhurlikka erishishidan oldin ko‘plab qiyinchiliklarni boshdan kechirgan. Aktrisa “Uy” va “Taqdir hukmdori” kabi filmlardagi rollari orqali tanilmasidan oldin 50 dan ortiq filmlarda suratga tushgan.
1980-yillar Rekha hayotida ijodiy faol davrlar bo‘ldi. Aktrisa “Opa-singillar” (1980-yil) va “Umrao Jaan” (1981-yil) filmlarida suratga tushganidan keyin mukofot bilan taqdirlangan, biroq shu bilan birga u ishtirok etgan ayrim filmlar muvaffaqiyatsizlikka uchradi. Oradan ko‘p o‘tmay hind kino olamida yangi aktrisalar — Shridevi va Madhuri Dikshit paydo bo‘lganligi sababli Rekha o‘zining 1-raqamli aktrisa maqomini yo‘qotdi.
1988-yil uni shon-shuhrat cho‘qqisiga qaytardi. Yozuvchi Yosir Usmon “Rekha: Aytilmagan hikoya” asarida “Qasos o‘ti” dramasi “uning butun hayotidagi eng yaxshi roli bo‘lganini” ta’kidlaydi. Filmni Rekhaning “Opa-singillar” (1980-yil) filmidagi partnyori, aktyor Rakesh Roshan suratga olgan.
“Qasos o‘ti” filmida Rekha ikki nafar kichkina bolasi bilan yolg‘iz qolgan Arti ismli beva ayol rolini o‘ynagan. U boyning yolg‘iz qizi, biroq bolalari bilan fermada kamtarona hayot kechiradi.
Artining otasidan norozi xodim Xiralol (Kader Xon ijrosida) uni o‘ldiradi. Oradan vaqt o‘tib Artiga o‘zining kelishgan jiyani Sanjayni (ushbu rolni Kabir Bedi ijro etgan) tanishtiradi.
Pulga tashna Sanjay Artiga qoyil qoladi va unga turmush qurish taklifini beradi. Bu voqeaning ertasiga Arti, uning dugonasi va Sanjay ko‘lga boradi. Sanjay Artini timsohlar ko‘p bo‘lgan suvga itarib yuboradi. Suv qonga to‘lganidan keyin Sanjay Artini o‘lgan deb taxmin qiladi.
Biroq, Artining o‘limini tasdiqlovchi tanasi bo‘lmasa, Sanjay yetti yil davomida uning boyligidan foydalana olmaydi. Shundan keyin Sanjay atrofdagilarga o‘zining haqiqiy qiyofasini ko‘rsata boshlaydi. Bu paytda Arti mehribon insonning yordami tufayli mo‘jizaviy tarzda tirik qoladi. Biroq u oynaga qaragach, dahshatga tushadi.
Arti og‘ir vaziyatda o‘zini qo‘lga oladi, olmos sirg‘alarini sotadi va uni tanib bo‘lmas darajada o‘zgartiradigan plastik jarrohlik amaliyotini boshdan kechirish uchun chet elga boradi. Hindistonga qaytgan Arti o‘zini mashhur model Jyoti qilib ko‘rsatib, Sanjaydan qasos olishga qaror qiladi.
Film sujeti Avstraliyaning “Edemga qaytish” mini-serialidan olingan. Artining ko‘lga tashlab yuborilishi, uning omon qolishi va zamonaviy makiyaj va rang-barang kostyumlar bilan modaga qaytishi sahnalari loyihaning asl nusxasidan olingan. “Edemga qaytish” filmidagi Stefani (Rebekka Jilling ijrosida) ham uning “o‘limi” uchun motam tutadigan sodiq itga ega bo‘lgan.
Rekha filmda suratga tushganida atigi 34 yoshda bo‘lgan. Biroq o‘sha paytda Bollivudda bu yosh aktrisalar uchun katta yosh deb hisoblangan. Aktrisa filmda ikkita — oddiy Arti va go‘zal model Jyoti rolini o‘ynashi kerak edi.
“Rakesh Roshan Rekhaning jozibali qiyofasini mohirlik bilan yaratgan. Film Bollivudning odatiy shablonli burilishlari bilan bezatilgan edi”, — deb yozadi Usmon. Ikkinchi qismdagi Rekhaning garderobi hozirda eskirgan ko‘rinadi, ammo bu 1980-yillarning modasi edi. Shunga qaramay, o‘sha paytdagi tomoshabinlarga film juda yoqdi.
Ushbu kartina “Edemga qaytish” ning remeykida qaqnus qushidek qayta tug‘ilgan va ommani o‘zining shiddati bilan lol qoldirgan Rekxaning shon-shuhrati gultojiga aylandi.
Uning film oxirida hayotini o‘z o‘rniga qaytarishni talab qiladigan, yovuz insondan gunohlari uchun o‘ch olgan qahramoni Amitabh Bachchan o‘ynagan rollarni eslatadi. Shundan so‘ng, ba’zilar aktrisani “Ledi Amitabh” deb atashni boshladi.
Kinokartina nafaqat yuqori kassa yig‘imlari va tanqidchilarning ijobiy fikrlari, balki Filmfare mukofotining yettita yo‘nalishiga nomzod bo‘ldi va shularning uchtasida g‘oliblikni qo‘lga kiritdi. Rekha “Eng yaxshi aktrisa”, Sonu Valiya “Eng yaxshi ikkinchi plandagi aktrisa” va muharrir Sanjay Verma “Eng yaxshi montaj” yo‘nalishida mukofotni qo‘lga kiritdi.
Biroq, filmdagi ayrim jarayonlar silliq kechmagan. Buning sababi, birorta ham Bollivud aktyori Sanjay rolini o‘ynashga rozi bo‘lmagan. Rakesh Roshan salbiy rolni ijro etadigan aktyorni topish qiyin bo‘lishini bilardi, bundan tashqari ushbu loyihada ham asosiy e’tibor aktrisaga qaratilardi.
U dastlab aktyor Dipak Parasharni bu rolga taklif qilmoqchi bo‘ldi, biroq Rekha Kabir Bedini taklif qildi. Kabir Bedi o‘zining eng mashhur xorijiy asari – Italiyaning “Sandokan” mini-serialida va Jeyms Bond haqidagi filmida suratga tushgan o‘sha paytda allaqachon dunyo bo‘ylab mashhurlikka erishib bo‘lgandi.
Aktyor bu paytda Gavayida bo‘lib, “Magnum” serialida suratga tushayotgan edi va rejissor Bedi o‘zining gullab-yashnayotgan karyerasini faqatgina bitta hind filmi uchun xorijda qoldirib, Hindistonga qaytishiga shubha qildi, ammo bari bir unga qo‘ng‘iroq qildi.
“Men Rakeshdan nima uchun aynan men bu rolni ijro etishim kerak, Bollivuddagilar ish tashlayaptimi’, deb so‘radim. U esa bizdagi hech bir aktyor yovuz qahramon rolini qabul qilmayotganini, men uning oxirgi umidi ekanligimni aytdi”, — deb eslaydi Kabir. Bedi uch oy vaqtini oladigan loyihada suratga tushishga rozi bo‘ldi.
Darvoqe, rejissor dastlab Jitendrani Artining turmush o‘rtog‘i epizodik rolini o‘ynashini rejalashtirgan, biroq u o‘sha kunlarda juda band bo‘lgan, shu bois Rakesh Roshan bu rolni o‘zi ijro etgan.
U Anita Rajni Nandini rolida ko‘rishni orzu qilgan, biroq aktrisa salbiy rol o‘ynashni istamagani uchun rad javobini bergan. Uning bu rolni rad etishi 1985-yilgi “Hindiston go‘zali” Sonu Valiyaga qo‘l keldi va unga nafaqat mukofotlar va tomoshabinlar muhabbatini, balki suratga olish maydonchasida Kabir Bedining muhabbatini ham keltirdi.
“Rakesh Roshan suratga olish jarayonida yana bir qancha qiyinchiliklarga duch keldi. Masalan, Rekxa va Shatrughan Sinha o‘tmishdagi kelishmovchiliklar tufayli bir-birlari bilan gaplashishmagan va rejissor ularni yarashtirishga uringan bo‘lsa-da bu ish uddasidan chiqa olmagan.
Kabir Bedining ssenariydan ko‘ngli to‘lmagan va filmdagi voqealarga o‘zgartirish kiritishni bir necha bor so‘ragan. Rakesh Roshan ba’zi sahnalarga o‘zgartirish kiritdi, ammo umuman olganda syujet bo‘yicha o‘z pozitsiyasida qoldi.
“Qasos o‘ti” filmi turli tillarda qayta ishlangan. Uning telugu tilidagi Suxasini rolini ijro etgan “Gautami”, Radhika ishtirokidagi tamil tilida “O‘zgarishlar shamoli” kabi variantlari bor.
Kinokartinada 1981-yilda turmush o‘rto‘gi bilan yaxtada suzib ketayotganda sirli sharoitda vafot etgan amerikalik aktrisa Natali Vudning o‘limi ochiq tasvirlangani aytiladi.
Izoh (0)