Тошкентдаги “Ёшлар ижод саройида” сўнгги кунларда кўплаб шов-шувларга сабаб бўлаётган, реал воқеалар асосида суратга олинган “Пирамида” сериалининг премьераси бўлиб ўтди. “Дарё” нашри ижодкорлари сериал тақдимотидан репортажни эътиборингизга ҳавола этади.
“Пирамида” — криминал, детектив жанрда суратга олинган ўзбек миллий сериали. Лойиҳа уч қисмдан иборат, унда молиявий фирибгарликнинг аянчли оқибатлари ҳақида ҳикоя қилинади.
“Бу лойиҳанинг бошқа лойиҳалардан фарқи — қўрқмасдан қўл урилган мавзуси борлигида, актёрларни ролига, ичидаги дардига қараб таклиф қилинганида. Бу уринишлар, иккиланишлар, танқидлар, хатолар — жуда яхши нарса. Агар шу танқидлардан тўғри хулоса чиқарилса, бу катта муваффақиятга олиб чиқади. Муваффақиятсизликнинг яхши томони шундаки, албатта, яхши томонга олиб чиқади. Бу жараёнлар ҳар бир давлатдан, компаниядан ўтган. Хато қилишдан қўрқиш керак эмас”, — дейди Ўзбекистонда хизмат кўрсатган артист Боир Холмирзаев.
Сериалнинг биринчи фаслида 50 дан ортиқ актёрлар ва оммавий саҳналар учун 100 дан ортиқ ҳаваскорлар қатнашган.
“Бу сериалдаги ролим — Давлат хавфсизлик хизмати ходими роли. У давлатга хиёнат қилаётган инсонларга қарши борадиган инсон бўлади. Бу ролни ўйнаганимдан жуда ҳам фахрланаман, чунки ўзим орзу қилган роллардан бири.
Сериалнинг бир саҳнасида фермер хўжалигига пул беркитиб қўйилган бўлади. Ҳаво совуқ, биз эса ўша ерни кавлашимиз керак эди. Трактор ишламай қолди, кейин уни ўзимиз кавладик. Кавлагандан кейин бир ҳафта ағанаб ётиб қолдим”, — дейди актёр Ахрор Алижонов.
Лойиҳада мансабдор шахсларнинг коррупцияга йўл қўяётгани ҳам очиб берилган. Умуман олганда, сериал орқали аҳолининг ҳуқуқий саводхонлигини ошириш, огоҳликка чорлаш ғояси илгари сурилган.
“Сериалдаги ролим бир қарашда салбий кўриниши мумкин, бироқ ҳар бир қисм давомида унинг ҳақиқатлари, кечинмалари очиб берилади. Образимни ёмон ишдаги яхши инсон деб баҳолаган бўлардим. У қийин вазиятларда ҳам ёнидаги инсонларни ташлаб кетмайди, катта пул учун ҳам ўз шерикларини сотмайди”, — дейди Сурат Исломов.
“Лойиҳада Рустам ролини ижро этганман. Сериал Аҳмадбой ҳақида, биз унинг атрофидаги қўриқчилари бўламиз. Иш қийинчилик билан, совуқ ҳавода суратга олиш жараёнларини давом эттирган пайтларимиз ҳам бўлди”, — дейди Асрор Ҳамидов.
“Биз шу соҳанинг мутахассислари билан ишладик. Шу нарсаларни ипидан игнасигача ўргандик. Спорт билан шуғулландик. Сериални олишдан мақсад — кўпчилик билади, Ўзбекистонда йирик молиявий пирамида қурбонлари жуда ҳам кўп бўлган. Шунинг прототипини олиб, сериал яратдик.
Инсонлар ҳали ҳам шу нарсаларга алданяпти. Унинг ҳар хил турлари бор: кимдир машина, кимдир мол, кимлардир эса пул билан шуғулланади. Бу биринчи масала, иккинчи масала, сериал саноатимизда қайнона, келин муносабатларидан нарига ўтмай қолдик. Мақсад — мана шу нарсани ўзгартириш”, — дейди лойиҳада бош роллардан бирини ижро этган актёр Умид Соатов.
Сериал премьерасидан тайёрланган тўлиқ репортажни қуйида томоша қилишингиз мумкин.
Изоҳ (0)