Turizm qo‘mitasi huzuridagi korxona rahbari tilla taqinchoqlar do‘koni asoschisi ekani aniqlandi

Turizm qo‘mitasi va uning huzuridagi “Milliy PR-markazi” davlat unitar korxonasiga taqdimnoma kiritildi. Bu haqda Korrupsiyaga qarshi kurashish agentligi axborot xizmati xabar berdi.

Unga ko‘ra, Korrupsiyaga qarshi kurashish agentligi tomonidan Turizm qo‘mitasi huzuridagi “Milliy PR-markazi” davlat unitar korxonasi rahbari D.Samandarovaning tadbirkorlik faoliyati bilan shug‘ullanib kelayotganiga oid xabar yuzasidan o‘rganish o‘tkazildi. O‘rganish davomida  “Milliy PR-markazi” davlat unitar korxonasi rahbari Samandarova Dilfuza Mansurovna 2023-yil 22-fevralda davlat ro‘yxatidan o‘tkazilgan “Avtoimkon trade” MCHJda 50 foizlik ulush bilan ta’sischi ekani aniqlandi.

Shuningdek,  D.Samandarova ijtimoiy tarmoq orqali Toshkent shahar markazida joylashgan tilla taqinchoqlar do‘koni asoschisi ekanini bayon qilgan va ushbu do‘konning ijobiy xususiyatlarini reklama qilgan.

Agentlik tomonidan yuqoridagi holatlarni bartaraf etish bo‘yicha 19-sentabr kuni Turizm qo‘mitasi va uning huzuridagi “Milliy PR-markazi” davlat unitar korxonasiga taqdimnoma kiritildi.