O‘zbekistonda o‘zgalar parvarishiga muhtoj bo‘lgan yolg‘iz keksalar soni ochiqlandi

O‘zbekistonda o‘zgalar parvarishiga muhtoj bo‘lgan yolg‘iz keksalarning soni 18 417 nafarga yetdi. Bu haqda Ijtimoiy himoya milliy agentligi axborot xizmati xabar berdi.

Shu yilning boshidagi ma’lumotlarga ko‘ra, o‘zgalar parvarishiga muhtoj bo‘lgan yolg‘iz keksalarning soni 18 417 nafarga yetgan. Ularni asosan yolg‘izlik, salomatlik va xavfsizlik masalalari, harakatlanish cheklanganligi, kundalik uy ishlarini bajarishda qiyinchilik, noto‘g‘ri ovqatlanish, xotira susayishi, firibgarlik va suiiste’mollarga qarshi zaiflik, o‘z-o‘zini parvarish qilolmaslik va ijtimoiy xodimlar tomonidan parvarishlash grafigining noto‘g‘ri shakllantirish kabi muammolari qiynab keladi.

Qayd etilishicha, tizimdagi eng katta muammolardan biri bu yolg‘iz keksalar bo‘yicha aniq ma’lumotlarning yo‘qligi bo‘lib qolmoqda. Turli idoralar tomonidan yuritiladigan ma’lumotlar bazasi o‘rtasida nomutanosibliklar mavjud bo‘lib, bazalarga ma’lumotlar noto‘g‘ri kiritilishi holatlari ham uchrab turadi.  Bugungi kunda agentlik tomonidan yolg‘iz keksalarning haqqoniy elektron bazasini shakllantirish bo‘yicha ishlar davom ettirilmoqda.