Namangan viloyatining Norin tumanidagi “Uchtepa” mahallasi joriy yildagi Open budjet loyihasining ikkinchi mavsumida g‘olib chiqib, ko‘chalarni asfaltlash uchun 1,3 milliard so‘m yutib oldi. Bu haqda “Daryo” muxbiri Azizbek Abduvaliyev xabar bermoqda.
Maʼlum bo‘lishicha, mazkur yutuq mahallaning Open budjet loyihasi boshlanganidan beri qo‘lga kiritgan sakkizinchi g‘alabasi ekan. Bu mamlakatdagi eng yaxshi natija ekanligi aytilmoqda.
Foto: Norin tuman hokimligi axborot xizmati
Oldingi yillarda transformator o‘rnatish, kabel tarmog‘ini yangilash, ko‘chalarni obodonlashtirish kabi turli yumushlar bajarilgan. Bu galgisi bilan qo‘shib hisoblaganda mahalla ahli jami 9 milliard so‘mdan ortiq loyihalarni amalga oshirgan.
“Mahallamizda 5 mingga yaqin aholi istiqomat qiladi. Juda ahilmiz, Open budjet kabi loyihalar boshlanib qolgudek bo‘lsa darrov uyushib, biror ovozni chetga chiqarmaymiz. Aksincha, boshqa hududlarda ishlovchilar ovoz surib kelishga harakat qilishadi. O‘zimiz ham qo‘l qovushtirib turganimiz yo‘q, hozir mahalladagi ikki ehtiyojmand oila uchun uy tiklayapmiz”, — deydi mahalla fuqarolar yig‘ini raisi Dilshod Sheraliyev.
Foto: Norin tuman hokimligi axborot xizmati
Open budjet loyihasidagi navbatdagi g‘alabani mahalla ahli konsert, dasturxonlarga tortilgan palov, bayramona bezatilgan tort va mushakbozlik bilan qarshi oldi.
Izoh (1)
Assalom alaykum bu Oʻzbekiston boʻyicha yagona natija emas. Qashqadaryo viloyati Koson tumani Etak MFY aholishi 8 marta gʻoliblikka erishgan. Bu boʻyicha malumot bermoqchiman sizlar bilan qanday boʻlmasam boʻladi?