O‘zbekistonda uysiz itlarni reabilitatsiya qilish bo‘yicha birinchi “Mehr” markazi Xalqaro bayram munosabati bilan Central Park (sobiq Telman)da itlarni yaxshi qo‘llarga topshirish festivalini o‘tkazdi. Bu haqda “Daryo” muxbiri xabar berdi.
Unda har kim bir-biridan muloyim itlarni erkalab, ularga mehr ulashishi, hamfikrlari bilan muloqot qilishi, maroqli vaqt o‘tkazishi mukin edi. Bundan tashqari mehmonlar mehr-oqibat darslari, itlar bilan yoga, raqs flesh-mobi, xayriya yarmarkasi, fudkortlar, dijeylar, musiqachilar ijodidan bahramand bo‘lishdi. Tashkilotchilarning so‘zlariga ko‘ra, festival o‘tkazish g‘oyasi bundan 2 yil avval tug‘ilgan. Tadbirning asosiy g‘oyalari sifatida itlarga munosib oilalar topish, ularga nisbatan mehr-shafqat tuyg‘ularini targ‘ib qilish, ushbu jonivorlar insonga eng yaqin do‘st ekanligini namoyish etishdan iborat.
Festivalning asosiy tashkilotchilari sifatida Food for Life jamoasi vakillari e’tirof etildi. Ushbu jamoa boshpanasizlar hamda mehribonlik uyi tarbiyalanuvchilariga ham g‘amxo‘rlik qilib kelmoqda. Aynan ularning tashabbusi bilan tadbirda fudkort, raqs flesh-mobi, mavzuli akvagrimlar hududlari tashkil etildi.
Shuningdek, Artha art-jamoasi, “Mehr va oqibat” hayvonlarni himoya qilish jamiyati vakillari ham yig‘ilganlarga it va mushuklarga bag‘rikeng bo‘lish, ularga mehr ulashish bo‘yicha zaruriy tushunchalarni o‘z ichiga olgan chiqishlar bilan ishtirok etdi. Festivalda mehmonlar Dalahast, Dj Sam, DJ Aracool, YoungNoize hamda DJ Piligrim kabi ijodkorlarning qo‘shiq va musiqiy chiqishlarini tomosha qilish imkoniga ega bo‘ldi.
Tadbir yakunlariga ko‘ra 4 mushuk bolasi va 3 ta it o‘zlariga oila topdi. Kelgusida ularning hayoti “Mehr” markazi tomonidan alohida nazorat qilib boriladi. Fetivalda Central Park, Artha, Food for Life, Agromir, “Mehr va oqibat”, “Vet+ZooPlaneta” jamoalari hamkor sifatida o‘z yordamlarini berganlari qayd etildi.
Izoh (0)