Namanganda 62-xalqaro gullar festivali yakuniga yetdi. Bu haqda “Daryo” muxbiri Azizbek Abduvaliyev xabar bermoqda.
Tadbir tashkilotchilarining bildirishicha, bir oy davom etgan festival davomida 6 milliondan ortiq mehmon qarshi olingan. Ulardan 100 mingga yaqinini AQSH, Buyuk Britaniya, Germaniya, Yaponiya, Janubiy Koreya, Saudiya Arabistoni, Xitoy, Pokiston, Eron, Hindiston, Qozog‘iston, Qirg‘iziston, Tojikiston va Rossiya kabi 30 dan ziyod mamlakatdan kelgan xorijiy sayyohlar tashkil etgan.
Xalqaro gullar festivali doirasida xalqaro IT-forum, turizm bo‘yicha ilmiy-amaliy konferensiya, hunarmandlar ko‘rgazmasi, o‘zbek palovi chempionati, qo‘l jangi bo‘yicha turnir, Farg‘ona vodiysi modalar haftaligi, O‘zbekiston milliy simfonik orkestri konserti, O‘zbek milliy akademik drama teatri spektakllari, askiya va kulgi kechalari, jahon estradasi yulduzlari — turkiyalik Rafet El Roman, ozarbayjonlik Tolib Tale va Zaynab Hasaniyning shou-dasturlari bo‘lib o‘tdi.
Davlatobod tumanidagi “Afsonalar vodiysi” bog‘i 62-xalqaro gullar festivalining taqdirlash marosimi va gala-konsertga mezbonlik qildi. Festival yakunlariga ko‘ra professional gulchi Oybek Nuriddinov, Norin tumani hokimligi, “Hududiy elektr tarmoqlari” aksiyadorlik jamiyati Namangan filiali va “Chortoq mineral water” qo‘shma korxonasi g‘oliblikni qo‘lga kiritdi hamda bosh sovrin—avtomobillarni qo‘lga kiritdi.
Shuningdek, “Eng yaxshi gul kompozitsiyasi”, “Eng yaxshi gulchilik maktabi”, “Eng ko‘p gul yetishtirgan gulchi” kabi nominatsiyalar bo‘yicha g‘oliblar ham taqdirlanib, ularga pul mukofotlari berildi. Festivalda faol ishtirok etganlar esa tashakkurnoma va esdalik sovg‘alari bilan taqdirlandi.
Tantanali marosim O‘zbekistonda xizmat ko‘rsatgan artistlar Ozoda Nursaidova va Ulug‘bek Rahmatullayev hamda viloyat sanʼat ustalari ijrosidagi gala-konsertga ulanib ketdi. Ikki soat davom etgan tadbir bayramona mushakbozlik bilan yakunlandi.
.jpg)
Izoh (0)