Prokuratura organlari tomonidan Madaniy meros agentligi bilan hamkorlikda tarixiy yodgorliklarni muhofaza qilish va saqlashga qaratilgan tadbirlar o‘tkazildi. Bu haqda Bosh prokuratura matbuot xizmati xabar berdi.
Qayd etilishicha, ushbu tadbirlar natijasida ming yillik tarixga ega bo‘lgan ko‘plab tarixiy yodgorliklar yo‘qolib ketish xavfidan saqlab qolinmoqda.
Xususan, Samarqand viloyati Ishtixon tumanida joylashgan IV-VIII asrlarga oid “Nomsiztepa-3” arxeologiya yodgorligini 9,6 metr kvadrat qismi fuqaro O.T. tomonidan o‘zboshimchalik bilan buzish harakatlari boshlangani aniqlanib, o‘z vaqtida to‘xtatib qolinishi natijasida ushbu tarixiy yodgorlikning 652 metr kvadrat maydoni saqlab qolingan.
Shu kabi, Toshkent viloyati Bo‘stonliq tumanida joylashgan ilk o‘rta asrlarga oid “Qo‘shqo‘rg‘ontepa” arxeologik yodgorligini 7,4 metr kvadrat tuproq qismi mahalliy fuqarolar tomonidan noqonuniy ravishda kesib olish harakatlari boshlangani aniqlanib, jinoiy qilmishlar o‘z vaqtida oldi olinishi natijasida ushbu obyektning 492 metr kvadrat maydoni saqlab qolingan.
Yodgorliklarga yetkazilgan jami 288 million so‘m zarar yuzasidan jinoyat ishlari qo‘zg‘atilib, dastlabki tergov harakatlari olib borilmoqda.
Bundan oldin Surxondaryoda arxeologiya yodgorligi fuqaroga bog‘dorchilik uchun berib yuborilgani aniqlangani, Buxoroda 5 ta arxeologiya yodgorligiga 291 mlrd so‘m zarar yetkazilgani, Surxondaryoda arxeologik yodgorliklar tuprog‘idan molxona, hojatxona qurilgani to‘g‘risida xabar berilgandi.
Izoh (0)