Прокуратура органлари томонидан Маданий мерос агентлиги билан ҳамкорликда тарихий ёдгорликларни муҳофаза қилиш ва сақлашга қаратилган тадбирлар ўтказилди. Бу ҳақда Бош прокуратура матбуот хизмати хабар берди.
Қайд этилишича, ушбу тадбирлар натижасида минг йиллик тарихга эга бўлган кўплаб тарихий ёдгорликлар йўқолиб кетиш хавфидан сақлаб қолинмоқда.
Хусусан, Самарқанд вилояти Иштихон туманида жойлашган IV-VIII асрларга оид “Номсизтепа-3” археология ёдгорлигини 9,6 метр квадрат қисми фуқаро О.Т. томонидан ўзбошимчалик билан бузиш ҳаракатлари бошлангани аниқланиб, ўз вақтида тўхтатиб қолиниши натижасида ушбу тарихий ёдгорликнинг 652 метр квадрат майдони сақлаб қолинган.
Шу каби, Тошкент вилояти Бўстонлиқ туманида жойлашган илк ўрта асрларга оид “Қўшқўрғонтепа” археологик ёдгорлигини 7,4 метр квадрат тупроқ қисми маҳаллий фуқаролар томонидан ноқонуний равишда кесиб олиш ҳаракатлари бошлангани аниқланиб, жиноий қилмишлар ўз вақтида олди олиниши натижасида ушбу объектнинг 492 метр квадрат майдони сақлаб қолинган.
Ёдгорликларга етказилган жами 288 миллион сўм зарар юзасидан жиноят ишлари қўзғатилиб, дастлабки тергов ҳаракатлари олиб борилмоқда.
Бундан олдин Сурхондарёда археология ёдгорлиги фуқарога боғдорчилик учун бериб юборилгани аниқлангани, Бухорода 5 та археология ёдгорлигига 291 млрд сўм зарар етказилгани, Сурхондарёда археологик ёдгорликлар тупроғидан молхона, ҳожатхона қурилгани тўғрисида хабар берилганди.
Изоҳ (0)