O‘zbekistonda davlat organlari rahbarlari faoliyatini jamoatchilik fikri asosida baholash amaliyoti yo‘lga qo‘yiladi. Bu haqda “O‘zbekiston — 2030” strategiyasi to‘g‘risidagi prezident farmonida belgilandi.
Farmonga ko‘ra, “O‘zbekiston — 2030” strategiyasi quyidagi 5 ta ustuvor yo‘nalishdan iborat:
- har bir insonga o‘z salohiyatini ro‘yobga chiqarish uchun munosib sharoitlar yaratish;
- barqaror iqtisodiy o‘sish orqali aholi farovonligini ta’minlash;
- suv resurslarini tejash va atrof-muhitni muhofaza qilish;
- qonun ustuvorligini ta’minlash, xalq xizmatidagi davlat boshqaruvini tashkil etish;
- “xavfsiz va tinchliksevar davlat” tamoyiliga asoslangan siyosatni izchil davom ettirish.
To‘rtinchi ustuvorda belgilangan, ya’ni xalq xizmatidagi davlat boshqaruvini tashkil etish va jamoatchilik boshqaruvini takomillashtirish bo‘yicha islohotlarni amalga oshirish bo‘yicha bir necha maqsadlar qo‘yilgan.
Xususan, davlat fuqarolik xizmatini melitokratiya (boshqaruv tamoyili bo‘lib, shaxslarning ijtimoiy kelib chiqishi va moliyaviy holatidan qat’i nazar, davlat boshqaruvida rahbarlik lavozimlarini eng qobiliyatli va munosiblar egallashi zarur, degan mazmunni anglatadi), halollik va professionallik tamoyillari asosida tashkil etish maqsadida:
- davlat organlari rahbarlari va ularning o‘rinbosalarlari faoliyatini jamoatchilik fikri asosida baholash amaliyoti yo‘lga qo‘yiladi;
- Milliy kadrlar zaxirasida rahbarlik lavozimiga nomzodlar sonin kamida ming nafarga yetkaziladi;
- “Davlat fuqarolik xizmati to‘g‘risida”gi qonunda nazarda tutilgan fuqarolik xizmati tizimini to‘liq ishga tushirish doirasida ushbu tizim bilan 70 dan ortiq davlat organlari qamrab olinishi ta’minlanadi.
- Davlat fuqarolik xizmatchilarini uzluksiz malaka oshirib borish tizimi bilan qamrab olish darajasi 100 foizga yetkaziladi.
Xalq bilan muloqotni yanada kengaytirish orqali aholi muammolarini aniqlash va hal etish tizimi samadorligini oshirish maqsadida davlat organlari va tashkilotlarida murojaatlarni qog‘oz shaklida ro‘yxatga olish amaliyoti bekor qilinadi.
Barcha davlat organlari va tashkilotlari hamda ularning hududiy bo‘linmalariga elektron shaklda, shu jumladan, tegishli mobil ilova orqali murojaat qilish imkoniyati yaratiladi. Murojaatlarning kamida 80 foizini mahalliy darajada qanoatlantirish ta’minlanadi.
Hududlarda mavjud ijtimoiy-iqtisodiy muammolarni mahallaning o‘zida hal qiladigan xalqchil tizim yaratiladi.
Izoh (0)