Сурхондарё вилояти божхона бошқармасининг “Сариосиё” чегара божхона постида юк машинасидан салкам 70 кг наркотик модда топилди. Бу ҳақда “Дарё”га бошқарма ахборот хизмати раҳбари Шоҳруз Ўролов хабар берди.
Таъкидланишича, божхоначилар йирик миқдордаги гиёҳвандлик воситаларини мамлакатга яширин усуллар билан олиб кирилишига чек қўйган.
Сурхондарё вилояти божхона бошқармасининг “Сариосиё” чегара божхона постида республикамизга кириб келган юк автотранспорт воситаси инспексион кўрик мажмуаси орқали кўздан кечирилганда ҳужжатларда кўрсатилгани каби “бўш” эмаслиги аниқланди.
Божхона ходимлари ва Давлат хавфсизлик хизмати чегара қўшинлари ҳарбий хизматчилари билан ҳамкорликда автотранспорт воситасида чуқурлаштирилган божхона кўригидан ўтказилганида, унинг кабинасидаги кўз илғамас бўшлиқларга 66 та ўрамлар яширилганлиги фош бўлди.
Мазкур ўрамлар очиб кўрилганда эса уларнинг 30 тасида 31,9 кг оғирликда героин, 36 тасида эса 37,3 кг оғирликдаги гашиш гиёҳванд воситаси жойлангани маълум бўлди, — дейди Шоҳруз Ўролов.
Аниқлаштирилишича, ушлаб қолинган гиёҳвандлик воситаларининг оғирлиги ўрами билан ҳисоблаганда 69,2 кг ни ташкил қилган.
Ҳозирда ҳолат юзасидан божхона органлари томонидан жиноят иши қўзғатилиб, терговга қадар текширув ҳаракатлари олиб борилмоқда.
Изоҳ (0)