Prezident qarori bilan tasdiqlangan “O‘zbekiston – 2030” strategiyasida davlat xizmatlarini ko‘rsatishda aholiga yanada qulayliklar yaratiladi va ortiqcha sansalorliklarga barham beriladi.
Xususan, 2024-yil 1-yanvardan boshlab aholiga yo‘l harakati xavfsizligi sohasida davlat xizmatlarini ko‘rsatishda, shu jumladan, avtomototransport vositalarini davlat ro‘yxatidan o‘tkazishda avtomototransport vositasining oldi-sotdi shartnomalari va boshqa notarial tasdiqlangan bitimlarni “Notarius” avtomatlashtirilgan axborot tizimidan olish amaliyoti yo‘lga qo‘yiladi va ariza beruvchilardan mazkur hujjatlarni talab qilish taqiqlanadi.
Shuningdek, 2024-yil 1-martdan boshlab notarial idoraga kelmasdan, shu jumladan, chet eldan turib mol-mulkdan foydalanish bilan bog‘liq bitimlarni (mulk huquqini boshqa shaxsga o‘tkazishdan tashqari) elektron raqamli imzodan foydalanib, videokonferensaloqa orqali rasmiylashtirish tartibi yo‘lga qo‘yiladi.
2022-yil fevral oyida O‘zbekistonda avtomobilni auksion orqali ijaraga berishda shartnomani notarial tasdiqlash bekor qilingani, O‘zbekistonda ilk bor notarial harakat onlayn tarzda amalga oshirilgani to‘g‘risida xabar berilgandi. Mart oyida esa O‘zbekistonda notariuslar tomonidan undiriladigan to‘lovlarning miqdori o‘zgartirilgan edi.
Izoh (0)