Qashqadaryo viloyatining G‘uzor tumanida faoliyat yurituvchi fermer tuman kadastr bo‘limi boshlig‘iga tuhmat qilishda ayblanib, sud qaroriga ko‘ra 2 million 310 ming so‘m jarimaga tortildi. Bu haqda “Daryo”ga Davlat kadastrlari palatasi Qashqadaryo viloyati boshqarmasi xabar berdi.
Ma’lum bo‘lishicha, Telegram kanallarining birida fermer xo‘jaligi raisining videomurojaati e’lon qilinib, unda kadastr bo‘limi boshlig‘i fermerning yeriga kelib, artezian kovlashiga to‘sqinlik qilayotgani, faoliyatiga xalal berayotgani aytilgan.
Mazkur holat boshqarma tomonidan o‘rganilganda tasdig‘ini topmagan. Shundan so‘ng bu holat bo‘yicha sudga murojaat qilingan.
Jinoyat ishlari bo‘yicha G‘uzor tuman sudida ijtimoiy tarmoqlar orqali Kadastr agentligining G‘uzor tumani bo‘limi boshlig‘iga nisbatan tuhmat qilinishi holati bo‘yicha ish ko‘rib chiqildi. Huquqbuzarga nisbatan Ma’muriy javobgarlik to‘g‘risidagi kodeksning 41-moddasi bilan shu kodeksning 33-moddasi qo‘llanib, bazaviy hisoblash miqdorining 2 baravari miqdorida — 660 ming so‘m jarima jazosi tayinlangan. Shuningdek, fermer kodeksning 40-moddasi bilan ham ayblanib, kodeksning 33-moddasi qo‘llangan holda, uzil-kesil 2 million 310 ming so‘mlik jarima to‘laydigan bo‘ldi, — deyiladi rasmiy tashkilot axborotida.
Izoh (0)