O‘zbekistonda “Aholi salomatligi — 2030” milliy strategiyasi ishlab chiqiladi. Bu haqda “Sog‘liqni saqlash vazirligi faoliyatini yanada takomillashtirish chora-tadbirlari to‘g‘risida”gi prezident farmonida belgilandi.
Hujjatda qayd etilishicha, ushbu strategiyani Sog‘liqni saqlash vazirligi xalqaro tashkilotlar va xorijiy konsalting kompaniyalarini jalb qilgan holda 2023-yil yakunigacha ilg‘or xorijiy tajriba asosida ishlab chiqadi.
Unda quyidagilarga asosiy e’tibor qaratiladi:
- aholini maksimal qamrab olgan holda birlamchi tibbiy-sanitariya xizmatini unga yanada yaqinlashtirish;
- fuqarolarning sog‘lom turmush tarzini, sog‘lom ovqatlanishini va jismoniy faolligini qo‘llab-quvvatlash, ularni aholi orasida har tomonlama targ‘ib qilish;
- onalik va bolalikni muhofaza qilish, aholining bu boradagi ehtiyojlarini qondirish;
- ixtisoslashgan tibbiy yordam ko‘lamini kengaytirish;
- sog‘liqni saqlash tizimini to‘liq raqamlashtirish, qog‘ozbozlikka, asossiz byurokratiyaga va navbatlarga chek qo‘yish, aholiga tibbiyot muassasalariga murojaat qilganida qulayliklar yaratish;
- zamonaviy va samarali boshqaruv usullarini joriy qilish va tibbiy xizmatlar sifatini oshirish;
- kadrlar salohiyatini oshirish, tibbiy ta’lim va ilm-fanni rivojlantirish;
- xususiy sektorni rivojlantirish va investisiyalarni jalb qilish hamda yirik davlat-xususiy sheriklik loyihalarini amalga oshirish;
- tibbiyot muassasalarining moddiy-texnika bazasini mustahkamlash;
- farmasevtika tarmog‘ini samarali tartibga solish.
Bundan avval ushbu farmon bilan 2024—2026-yillarda sog‘lom turmush tarzini shakllantirish, to‘g‘ri ovqatlanishni tizimli targ‘ib qilish va ommalashtirish dasturi ishlab chiqilishi haqida xabar berilgan edi.
Izoh (0)