Oliy Majlis Senati raisi Tanzila Norboyeva boshchiligidagi O‘zbekiston delegatsiyasi rasmiy tashrif bilan Belarusda bo‘lib turibdi. Tashrif doirasida Minsk shahrida O‘zbekiston–Belarus biznes doiralari va tadbirkor ayollar birinchi biznes-forumi bo‘lib o‘tdi. Bu haqda Senat axborot xizmati xabar berdi.
Ma’lum qilinishicha, tadbirda bir qator sohalarida tadbirkorlik qilayotgan o‘zbekistonlik va belaruslik ishbilarmon ayollar ishtirok etgan. Ular qishloq xo‘jaligi, oziq-ovqat sanoati, farmatsevtika, madaniy-gumanitar, turizm va transport, IT, ayollar uchun raqamli mahsulotlarni birgalikda ishlab chiqish, xotin-qizlarni raqamli iqtisodiyotga jalb etish masalalarida muloqot qilgan.
Forum doirasida ikki davlat vakillari o‘rtasida deklaratsiya imzolangan va hujjatda savdo-iqtisodiy, investitsiya, ilmiy-texnikaviy, ijtimoiy-madaniy, taʼlim, gumanitar, turizm va o‘zaro manfaatli boshqa sohalardagi hamkorlikni kuchaytirish masalalari aks etgan.
“Ikki mamlakat tadbirkor ayollari o‘rtasida “B2B” formatida o‘tkazilgan uchrashuvlar natijasida 92 million dollardan ortiq miqdorda 42 ta shartnoma va 17 ta memorandumlar imzolandi”,—deyiladi xabarda.
Avvalroq Tanzila Norboyeva Belarusga tashrifi davomida mamlakat prezidenti Aleksandr Lukashenko bilan uchrashgani xabar qilingandi.
Izoh (0)