Қашқадарё вилоятининг Ғузор туманида фаолият юритувчи фермер туман кадастр бўлими бошлиғига туҳмат қилишда айбланиб, суд қарорига кўра 2 миллион 310 минг сўм жаримага тортилди. Бу ҳақда “Дарё”га Давлат кадастрлари палатаси Қашқадарё вилояти бошқармаси хабар берди.
Маълум бўлишича, Telegram каналларининг бирида фермер хўжалиги раисининг видеомурожаати эълон қилиниб, унда кадастр бўлими бошлиғи фермернинг ерига келиб, артезиан ковлашига тўсқинлик қилаётгани, фаолиятига халал бераётгани айтилган.
Мазкур ҳолат бошқарма томонидан ўрганилганда тасдиғини топмаган. Шундан сўнг бу ҳолат бўйича судга мурожаат қилинган.
Жиноят ишлари бўйича Ғузор туман судида ижтимоий тармоқлар орқали Кадастр агентлигининг Ғузор тумани бўлими бошлиғига нисбатан туҳмат қилиниши ҳолати бўйича иш кўриб чиқилди. Ҳуқуқбузарга нисбатан Маъмурий жавобгарлик тўғрисидаги кодекснинг 41-моддаси билан шу кодекснинг 33-моддаси қўлланиб, базавий ҳисоблаш миқдорининг 2 баравари миқдорида — 660 минг сўм жарима жазоси тайинланган. Шунингдек, фермер кодекснинг 40-моддаси билан ҳам айбланиб, кодекснинг 33-моддаси қўлланган ҳолда, узил-кесил 2 миллион 310 минг сўмлик жарима тўлайдиган бўлди, — дейилади расмий ташкилот ахборотида.
Изоҳ (0)