Samarqand viloyati Kattaqo‘rg‘on tumanida qiz o‘z o‘qituvchisi unga tegajog‘lik qilganini aytib, tuhmat qilgani aniqlandi. Bu haqda viloyat Ichki ishlar boshqarmasi axborot xizmati “Daryo”ga xabar berdi.
Xabarga ko‘ra, holat yuzasidan tuman IIB tomonidan tergovga qadar tekshiruv harakatlari olib borilgan. Aniqlanishicha, 10-fevral kuni Kattaqo‘rg‘on tumanidagi maktablarning birida sinf rahbari sifatida ishlab kelayotgan o‘qituvchi voyaga yetmagan 6-sinf o‘quvchisi (qiz bola), 4 kun davomida dars qoldirgani sababli undan otasini chaqirishini so‘ragan.
Birozdan so‘ng maktabga o‘quvchining onasi kelgan. U bilan maktab maʼmuriyati gaplashib, qizining muntazam ravishda dars qoldirayotganini aytib, tushuntirish xati yozib berishini so‘rashgan. U hech narsa yozib bermasligini aytgan va maktabdan chiqib ketib turmush o‘rtog‘iga qiziga o‘qituvchisi tegajog‘lik qilganini aytgan.
Shundan keyin o‘quvchining otasi kelib, sinfxonada guruh rahbariga baqirib, uni qo‘pol so‘zlar bilan haqorat qilgan va yoqasidan tortib, janjal ko‘targan.
Ma‘lum qilinishicha, qizning onasi hamda o‘quvchining tushuntirish xatida o‘qituvchining tegajog‘lik qilgani to‘g‘risidagi vajlari o‘z tasdig‘ini topmagan. To‘plangan hujjatlar yuzasidan qizning otasi xatti-harakatida Ma‘muriy javobgarlik to‘g‘risidagi kodeksning 183-moddasi (mayda bezorilik), onasinikida esa 40-moddasida (tuhmat) nazarda tutilgan maʼmuriy huquqbuzarlik alomatlari borligi sababli to‘plangan xujjatlar qonuniy qaror qabul qilish uchun JIB Kattaqo‘rg‘on tuman sudiga yuborilgan.
Sud organi tomonidan o‘quvchining ota-onasiga nisbatan jarima jazosi qo‘llanilgan.
Izoh (0)