Toshkentda 37 yoshli ayol o‘zi yaxshi ko‘rgan erkak boshqa birov bilan yurib ketmasligi uchun uni qamatmoqchi bo‘ldi. Bu haqda poytaxt IIBB axborot xizmati xabar berdi.
Qayd etilishicha, Mirzo Ulug‘bek tumani IIB navbatchilik qismiga murojaat qilgan ayol aldanganini ma’lum qilgan. Navbatchi tomonidan chaqirilgan tezkor-qidiruv xizmati xodimi ariza muallifini tinglab, u o‘z ko‘rsatmasida ko‘p bora chalkashliklarga yo‘l qo‘yganiga e’tibor qaratgan.
37 yoshli Shoira (ismlar o‘zgartirilgan) o‘z arizasida Nosir ismli shaxsga nisbatan qonuniy chora ko‘rilishini so‘ragan. Ayolning so‘zlariga ko‘ra, u Nosir bilan yaqinda tanishgan bo‘lib, bozorda tasodifan uchrashib qolgan. Erkak undan qo‘ng‘iroq qilib olish uchun telefonini berib turishni so‘ragan.
Shoira unga telefonini bergan va suhbatga xalaqit bermaslik uchun bir necha qadam nariga ketgan. Ayol bozor rastalaridagi tovarlarga ko‘z yugurtirib chiqqunicha, Nosir ketib qolgan. Shoira telefoni narxi 5,6 million so‘mni tashkil etganini, erkakning ismi va taxminiy yashash joyidan boshqa ma’lumotlarni bilmasligini aytgan.
Oradan bir kun o‘tmay, Shoira yana IIB navbatchilik qismiga kelib, Nosir unga pichoq bilan tahdid qilib, 5,5 million so‘mlik telefonini olib ketgani to‘g‘risida yangi ariza yozgan.
Tezkor-qidiruv xizmati xodimlari gumonlanuvchining shaxsiga aniqlik kiritgan. Ma’lum bo‘lishicha, 30 yoshli Nosir Shoira bilan birga yashab kelgan. Xodimlar erkakka ayblovni aytganida, u mazkur voqeadan shokka tushib qolgan.
Nosirning aytishicha, u Shoira bilan qariyb yarim yildan beri tanish bo‘lib, oxirgi oylarda ularning munosabati yomonlashgan. Barchasida ayolning rashki sabab bo‘lib, u erkakka jahl qilib yurgan: Shoira uni yo‘qotib qo‘yishdan qo‘rqqan, shu boisdan ham ayol shu kabi usulda unga tuhmat qilgan.
Shoira avvaliga o‘z aybiga iqror bo‘lmagan, ammo rad etib bo‘lmas dalillar keltirilganidan so‘ng u haqiqatni tan olib, Nosirning taxminlarini tasdiqlagan.
Holat bo‘yicha Jinoyat kodeksining 139 (tuhmat), 237 (yolg‘on xabar berish) va 238-moddalari (yolg‘on guvohlik berish) bilan jinoyat ishi qo‘zg‘atilgan. Jinoyat ishlari bo‘yicha Mirzo Ulug‘bek tuman sudining hukmi bilan 37 yoshli Shoira aybli deb topildi. Ayolning uch nafar voyaga yetmagan farzandi borligi inobatga olinib, unga ikki yillik shartli qamoq jazosi tayinlangan.
Izoh (0)