O‘zbekiston bo‘ylab tibbiy sug‘urtani 2026-yilning yakunigacha to‘liq joriy etish rejalashtirilmoqda. Bu haqda Sog‘liqni saqlash vazirligi faoliyatini yanada takomillashtirish chora-tadbirlari to‘g‘risida”gi prezident farmonida keltirilgan.
Unda belgilanishicha, sog‘liqni saqlash vaziri va Davlat tibbiy sug‘urtasi jamg‘armasi ijrochi direktori 2026-yilning yakuniga qadar tibbiy sug‘urtaning respublika bo‘ylab to‘liq joriy etilishi uchun shaxsan javobgar hisoblanadi.
Farmonga ko‘ra, 2024-yil 1-yanvardan Davlat tibbiy sug‘urta jamg‘armasi yuridik shaxs maqomi hamda ular faoliyatini moliyalashtirishning amaldagi manbalari va tartibini saqlab qolgan holda Sog‘liqni saqlash vazirligi tuzilmasiga o‘tkaziladi.
2027-yil 1-yanvardan esa Sog‘liqni saqlash vazirligi tarkibidan chiqariladi va mustaqil jamg‘arma sifatida faoliyat yuritadi.
Davlat tibbiy sug‘urta jamg‘armasining kuzatuv kengashi tibbiy yordamning kafolatlangan hajmi doirasida tibbiy xizmat ko‘rsatish uchun jalb qilinadigan yetkazib beruvchilar (davlat va nodavlat)ni, xarid qilinadigan tibbiy yordamlar hajmini mustaqil belgilaydi va o‘z budjetini shakllantiradi.
Davlat budjeti mablag‘lari hisobiga imtiyozli toifaga kiruvchi shaxslarga tashxis qo‘yish va davolash bo‘yicha tasdiqlangan standartlarga muvofiq tibbiy xizmatlarning bazaviy narxlari Sog‘liqni saqlash vazirligi tomonidan Iqtisodiyot va moliya vazirligi hamda Raqobatni rivojlantirish va iste’molchilar huquqlarini himoya qilish qo‘mitasi bilan kelishgan holda belgilanadi.
Prezidentning 2018-yil dekabrdagi qarorida 2021-yildan boshlab majburiy tibbiy sug‘urta tizimini bosqichma-bosqich joriy etish belgilangandi. 2020-yil noyabrida davlat rahbari Sirdaryo viloyatida tajriba-sinov loyihasi doirasida davlat tibbiy sug‘urtasini joriy etish bo‘yicha qarorni imzolagandi.
Izoh (0)