AQSH Minuteman III qit’alararo ballistik raketasini sinovdan o‘tkazdi. Bu haqda AQSH kosmik kuchlari matbuot xizmati xabar berdi.
Raketa 6-sentabrga o‘tar kechasi Kaliforniyadagi Vandenberg havo kuchlari bazasidan uchirilgan. Missiyaga rahbarlik qilgan polkovnik Brayan Titusning so‘zlariga ko‘ra, “bu sinovlar AQSH yadroviy kuchlarining tayyorligini ko‘rsatadi va milliy yadroviy to‘xtatuvchi vositalarning samaradorligiga ishonchni uyg‘otadi”.
Pentagon matbuot kotibi Pat Rayder 2-sentabr kuni tegishli sinov haqida e’lon qilgandi. U mazkur parvoz bir necha yil avval rejalashtirilganini aytgan. Ikki tomonlama kelishuvlarga muvofiq, AQSH bo‘lajak sinov parvozi haqida Rossiyani oldindan xabardor qilgan.
.jpeg)
Minuteman III — 1970-yildan beri AQSH armiyasida xizmat qilib kelayotgan qit’alararo ballistik raketa. Uning uchish masofasi taxminan 9,5 ming kilometrni tashkil qiladi. Ushbu raketaning so‘nggi sinovlari 2023-yil aprel oyida bo‘lib o‘tgan, o‘shanda ham u Vandenberg bazasidan ishga tushirilgan.
Izoh (0)