Buyuk Britaniya mudofaa vaziri Grant Shepps Ukrainada yo‘q qilingan Challenger 2 tanki haqida avvalroq paydo bo‘lgan ma’lumotlarni tasdiqladi. Vazirning bayonoti Sky News telekanalida efirga uzatildi.
“Bu, aftidan, bizga ma’lum bo‘lgan birinchi yo‘qotish”, — dedi Shepps. Uning so‘zlariga ko‘ra, tank Rossiya artilleriyasi zarbasiga uchragan. Challenger 2 ekipajining barcha olti a’zosi omon qolgan.
5-sentabr kuni ijtimoiy tarmoqlarda Rabotino qishlog‘i yaqinida yonayotgan Challenger 2 tankining videosi tarqaldi.
G‘arb razvedka idoralari ma’lumotlariga ko‘ra, tank avvaliga minaga uchrab, uning orqa yonilg‘i baki yonib ketgan. Ekipaj tankni tark etgan, so‘ng bo‘sh turgan tankka Rossiya droni kelib urilgan.
The Guardian qayd etishicha, bu Challenger 2 tanki foydalanishga topshirilgan 1994-yildan beri ilk bor uning jang maydonida yo‘qotilishi bo‘ldi. 2003-yilda bunday tank Iroqda “do‘stona o‘t ochish” natijasida vayron qilingan. Gazetaning takidlashicha, bunday statistika ushbu modeldagi tanklar kamligi va kamdan kam qo‘llanishi bilan bog‘liq.
Buyuk Britaniya 2023-yil mart oyida Ukrainaga Challenger 2 tanklarini yetkazib berishini e’lon qildi. Hammasi bo‘lib, Ukraina qo‘shinlari 14 ta shunday texnikani oldi. Britaniya Qurolli kuchlari ixtiyorida 213 ta Challenger 2 qoldi, ulardan 157 tasi foydalanishga tayyor holatda.
Izoh (0)