AQSH birinchi xonimi yana koronavirusga chalindi

AQSH birinchi xonimi Jill Baydenda koronavirus testi musbat chiqdi. Bu haqda Oq uy veb-saytida xabar berildi.

“Kasallik alomatlari yengil. U Delaver shtati, Rexobot-Bichdagi uyida bo‘lib turibdi”, — dedi birinchi xonim matbuot kotibi Elizabet Aleksandr.

Shundan so‘ng Oq uy matbuot kotibi Karin Jan-Pyer birinchi xonimda koronavirus aniqlanganidan so‘ng uning turmush o‘rtog‘i prezident Jo Bayden ham COVID-19 testidan o‘tganini va manfiy natija olganini qo‘shimcha qildi. Jan-Pyer ushbu haftada davlat rahbari muntazam ravishda testdan o‘tkazilishini ta’kidladi.

2022-yil iyul oyida Jo Baydenning koronavirusga topshirgan testi musbat chiqqan edi, prezidentda kasallikning yengil alomatlari namoyon bo‘lgan. U Oq uyda izolyatsiya qilingan va o‘z vazifalarini bajarishda davom egan. Jill Bayden esa o‘tgan yili avgust oyida ketma-ket ikki marta koronavirus bilan kasallangan.

Ma’lumot uchun, hozirda Jill Bayden 72, Jo Bayden esa 80 yoshda.