Rossiya prezidenti Vladimir Putin Checheniston rahbari Ramzan Qodirovning qizi Ayshat Qodirovani II darajali “Vatan oldidagi xizmatlari uchun” ordeni bilan taqdirladi. Tegishli farmon huquqiy axborotning rasmiy internet portalida eʼlon qilindi.
Hujjatga ko‘ra, 24 yoshli Qodirova bir qancha odamlar qatori “milliy madaniyat va san’atni rivojlantirishdagi xizmatlari, ko‘p yillik samarali ijodiy faoliyati uchun” taqdirlangan.
Ayshat Qodirova 2021-yil oktabridan buyon Checheniston madaniyat vaziri lavozimida ishlab kelmoqda. Bungacha u bir yil Checheniston Madaniyat vazirligi rahbarining birinchi o‘rinbosari sifatida faoliyat olib borgan.
Davlat xizmatidan oldin u Firdaws islom modalar uyini uch yil boshqargan. Shu vaqt ichida Ayshat
- “Checheniston oldidagi xizmatlari uchun” medali;
- “Inson huquqlarini himoya qilgani uchun” medali;
- “A’lo mehnati uchun” faxriy nishoni;
- Chechenistonda xizmat ko‘rsatgan madaniyat xodimi unvoni;
- Qodirov ordeni — respublikaning oliy mukofoti bilan taqdirlangan.
Ramzan Qodirov va uning oilasi muntazam ravishda taqdirlanib keladi.
Checheniston rahbarining qarindoshlari qanday mukofotlar olgan?
Ramzan Qodirovning qarindoshlari xuddi o‘zi kabi muntazam ravishda mintaqaviy va federal mukofot va unvonlar oladi.
- 2022-yil noyabrda Putin Checheniston rahbarining rafiqasi Medni Qodirovaga “Qahramon ona” unvonini bergan.
- 2023-yil fevralda Qodirovning o‘zi birinchi “Checheniston qahramoni” bo‘ldi (bu unvonni uning o‘zi ta’sis etgan) va mart oyida u “Chechenistonda xizmat ko‘rsatgan inson huquqlari himoyachisi” medalini oldi.
- Iyun oyida Checheniston rahbarining 20 yoshli qizi Xutmat “tibbiyot rivojiga qo‘shgan ulkan hissasi” uchun respublikaning oliy ordeni bilan taqdirlangan edi.
- Putin Checheniston rahbarining 26 yoshli jiyani Hamzat Qodirov “Vatan oldidagi xizmatlari uchun” II darajali ordeni bilan taqdirlagandi. U “faoliyatidagi muvaffaqiyatlar va ko‘p yillik vijdonli mehnati uchun” mukofotlangan.
BBC rus xizmatining 2018-yilda hisob-kitoblariga ko‘ra, Chechenistondagi 158 nafar yuqori martabali amaldorning 30 foizi respublika rahbarining qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir.
“Qarindoshlarimning har qanday muassasa va har qanday lavozimdagi talabi o‘n barobar ko‘p, chunki ular menga qaramay ishlashlarini isbotlashi kerak. Kimga ishonsam, o‘shani tayinlayman”, — degan edi Qodirov bu borada.
Izoh (0)