АҚШ биринчи хоними Жилл Байденда коронавирус тести мусбат чиқди. Бу ҳақда Оқ уй веб-сайтида хабар берилди.
“Касаллик аломатлари енгил. У Делавер штати, Рехобот-Бичдаги уйида бўлиб турибди”, — деди биринчи хоним матбуот котиби Элизабет Александр.
Шундан сўнг Оқ уй матбуот котиби Карин Жан-Пьер биринчи хонимда коронавирус аниқланганидан сўнг унинг турмуш ўртоғи президент Жо Байден ҳам COVID-19 тестидан ўтганини ва манфий натижа олганини қўшимча қилди. Жан-Пьер ушбу ҳафтада давлат раҳбари мунтазам равишда тестдан ўтказилишини таъкидлади.
2022 йил июль ойида Жо Байденнинг коронавирусга топширган тести мусбат чиққан эди, президентда касалликнинг енгил аломатлари намоён бўлган. У Оқ уйда изоляция қилинган ва ўз вазифаларини бажаришда давом эган. Жилл Байден эса ўтган йили август ойида кетма-кет икки марта коронавирус билан касалланган.
Маълумот учун, ҳозирда Жилл Байден 72, Жо Байден эса 80 ёшда.
Изоҳ (0)