Tashqi ishlar vaziri Baxtiyor Saidov 1-sentabr kuni O‘zbekistondagi diplomatik missiyasini yakunlayotgan Eron elchisi Hamid Nayrobodiyni qabul qildi. Bu haqda TIV rahbari o‘zining Telegram kanaliga yozib qoldirdi.
“O‘zbekistonda to‘rt yillik faoliyatini yakunlayotgan Eron elchisi Hamid Nayrobodiy janoblari bilan uchrashdik. Janob elchining O‘zbekiston—Eron munosabatlarini har tomonlama faollashtirishga qo‘shgan hissasini yuqori baholaymiz va kelgusi faoliyatida ulkan muvaffaqiyatlar tilaymiz”, — deb yozadi Baxtiyor Saidov.
Hamid Nayrobodiy 2019-yildan buyon Eronning O‘zbekistondagi elchisi sifatida faoliyat yuritib kelayotgan edi. Undan oldin Bahman Og‘oroziy Dormani Eronning mamlakatdagi elchisi bo‘lgandi.
Avgust boshlarida Shadurdi Meredov Turkmanistonning O‘zbekistondagi favqulodda va muxtor elchisi etib tayinlangani, Baxtiyor Saidov O‘zbekistondagi diplomatik missiyasini yakunlayotgan Gruziya elchisi Zurab Abdushelishvilini qabul qilgani to‘g‘risida xabar berilgandi.
Izoh (0)