“Daryo” reportaji: Namangan tanovari, raqsga tushayotgan momolar va bayram mushakbozligi (video)

Namangandagi “Afsonalar vodiysi” bog‘ida Mustaqillikning 32 yilligiga bag‘ishlangan bayram tadbiri bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Qayd etish joizki, bayram arafasida viloyatda ko‘plab iqtisodiy-ijtimoiy ahamiyatga ega obyektlar foydalanishga topshirildi.

Jumladan, Chortoq dehqon bozori, shu tumandagi ixtisoslashtirilgan maktab, Yangi Namangan tumanida Boborahim Mashrab nomli xususiy maktab, Stanford nodavlat taʼlim tashkiloti, Davlatobod tumanida 8 ta mahallani o‘zaro bog‘lovchi ko‘prik, Kosonsoy tumanida ko‘p tarmoqli markaziy poliklinika, Chust tumanida mevani qayta ishlash zavodi, Yangi Namangan shaharchasi markaziy yo‘li va Namangan xalqaro aeroporti terminali shular jumlasidan.

“Viloyatni ijtimoiy-iqtisodiy rivojlantirish, mahallalar infratuzilmasini yaxshilash uchun bu yilgidek katta mablag‘ ajratilgan emas. Joriy yil 1,5 mingdan ziyod obyektni qurish, taʼmirlash va obodonlashtirishga jami 3,2 trillion so‘mdan ortiq mablag‘ yo‘naltirildi. Bu o‘tgan yilga nisbatan 1,7 trillion so‘mga ko‘p”, — dedi tadbirda so‘zga chiqqan viloyat hokimi Shavkat Abdurazzoqov.

Shundan so‘ng teatrlashtirilgan tomosha va gala-konsert boshlandi. Tomoshabinlar viloyat sanʼat ustalari, taniqli xonandalar Lola Ahmedova va Sardor Toirovning chiqishlarini olqishlar bilan qarshi oldi.

O‘zbekiston xalq artisti Kamoliddin Rahimov ijrosidagi mashhur “Namangan tanovari” qo‘shig‘ini hofizning farzandi Husanboy Rahimov va shogirdlari jo‘rovozlikda kuylab chiqqani esa konsertning o‘ziga xos avj nuqtasi bo‘ldi hamda barchani raqsga chorladi.

Namangandagi Mustaqillikning 32 yilligiga bag‘ishlangan tantanali tadbir bayram mushakbozligi bilan yakuniga yetdi.