O‘zbekistonda talabalarga yotoqxona to‘lovi bo‘yicha imtiyozni oliy ta’lim muassasalari Kengashi belgilaydi. Bu haqda Telegram’dagi “Ta’lim nazorati” kanali xabar berdi.
Ushbu imtiyoz quyidagi shakllarda berilishi mumkin:
Yotoqxona to‘lovlaridan butunlay ozod etiladi
- ko‘z kasalliklari bo‘yicha 1-2-guruh nogironligi borlar;
- chin yetimlar (ota-onasining har ikkisi vafot etganlar) va yetimlar (ota-onalaridan biri vafot etganlar);
- mehribonlik uyi tarbiyalanuvchilari;
- hamda ijtimoiy himoyaga muhtoj talabalar.
Umumiy to‘lovdan 50 foiz chegirma beriladi
- umumiy kasalliklar bo‘yicha 2-guruh nogironlari;
- vazifasini namunali bajarayotgan talabalar kengashi raisi, qavat sardori hamda yotoqxona kutubxonasi uchun mas’ul talabalarga.
Mart oyida O‘zbekistonda 2023-yil yakuniga qadar 18 ming o‘rinli talabalar turar joylari qurilib, foydalanishga topshirilishi to‘g‘risida xabar berilgandi. O‘shanda yil yakuniga qadar talabalar turar joyi fondini 127 ming o‘rindan oshirish rejalashtirilgani aytilgan edi.
Avgust o‘rtalarida oliy taʼlim, fan va innovatsiyalar vaziri Ibrohim Abdurahmonov Toshkent shahrida joylashgan oliy taʼlim muassasalari rektorlari va prorektorlari bilan uchrashib, talabalar turar joylari masalasini muhokama qilgandi. Unda universitet hududlarida talabalarni yotoqxonalar va ijara uylariga joylashtirish markazlarini yo‘lga qo‘yishga, ularda lider talabalar hamda tyutorlarning faoliyatini tashkil qilishga kelishib olingan edi.
Izoh (0)