Ijtimoiy tarmoqlardagi chiqishlari bilan mashhurlikka erishgan Bobur Mansurovni “Daryo”ning YouTube’dagi kanaliga bergan intervyusida professional ijodga qaytgani va jamoasiga nega yangi a’zolar qabul qilinmasligining sabablari haqida so‘zlab berdi.
— Serial suratga olganimizdan keyin bir muddat professional ijoddan uzilib qolgandim. Rejissor Rustam Sa’diyevning rolga taklif qilishi xayolimga ham kelmagandi. “Kallaxona love” filmidagi rolim u qadar katta emas, ammo tomoshabin yodida qoladi, deb o‘ylayman. Bundan avval ham bir nechta rejissorlar takliflar bilan chiqishgandi. Ammo vaqt topishim qiyin bo‘lgani uchun takliflarni rad etishga majbur bo‘lgandim. Instagram shunday tarmoqki, yangi video joylanmasa, tezda profil faollikni yo‘qotadi. Biz esa yillik shartnomalarni olganmiz. Har oy reklama beruvchilar uchun bitta kreativ video suratga olib joylashimiz kerak. Bu bois hozircha bor e’tiborimizni vaynlarga qaratishga majburmiz. Jamoamizdagi yigitlarning bari professional aktyorlar. Anchadan buyon yaxshi film suratga olishni rejalashtirib yuribmiz. Agar Rustam Sa’diyev rejissorlik qilishga rozi bo‘lsa, shu filmni tasvirga olish ishlarini boshlab yuborardik, — deydi Bobur Mansurov.
Keyingi paytlarda “Bobur Mansurovning videolari avvalgidek kulgili emas, hatto imiji ham eskirdi”, kabi gap-so‘zlar qulog‘imizga chalinyapti. U videolar bir-biriga o‘xshab qolmasligi uchun nimalarga ahamiyat beradi?
— Video ostida qoldirilgan izohlarni erinmay o‘qib chiqaman. To‘g‘ri, orada bunday fikrlar ham bo‘ladi. Videolar bir-biriga o‘xshab qolmasligiga harakat qilaman, ammo ikki-uch marta biz “bo‘lmaydi” deb profildan o‘chirgan eski videolar boshqa kanallarga joylanib, xuddi yangidek namoyish etilyapti. Videolarimiz juda ko‘p, afsuski, ular orasida bo‘lmaydi, deb voz kechganlarimiz ham talaygina.
Vaynerlikni endi boshlagan paytda odamlarga qanday videolar yoqishini bilmasdik. Hozir bu borada ancha tajribamiz bor. Bir-ikki marta biz kutmagan videolar topga chiqqanini hisobga olmaganda, taxminlarimiz deyarli to‘g‘ri chiqadi, — deydi Bobur Mansurov.
Ijodkorlar orasida epidemiyaga aylanayotgan vaynerlik kun kelib yo‘qolishi mumkinmi? Bu savolga Bobur Mansurov quyidagicha javob berdi.
— Tan olish kerak, kichik videolarni suratga olib, ijtimoiy tarmoqlarga joylash urf bo‘lgan. Yoshi katta san’atkorlarimizning ham bunday videolar suratga olishayotganini to‘g‘ri qabul qilish kerak. Zamon senga boqmasa, sen zamonga boq, deb bejiz aytishmaydi. Yaqinda ko‘rib qoldim, Leonardo Di Kaprio ham kichik video suratga olib, ijtimoiy tarmoqqa joylabdi. Dunyo tanigan aktyorlar oldida mening mashhurligim hech narsa emas. Ular video suratga olayotganda, nega bunday qilmasligimiz kerak? Afsuski, ba’zi insonlar Instagram’ga joylagan har qanday videoga vayn deb qarashadi. Aslida, vayn bir necha soniyalik video bo‘lishi kerak. Biz esa ikki daqiqalik videolarni suratga olamiz. Yo‘nalishi jihatdan olib qaraganda, ular eski miniatyuralarning zamonaviy shakli hisoblanadi.
Professional ijodkor bo‘lamiz, degan umidda Toshkentga kelganmiz. To‘rt yil davomida institutda o‘qish ham oson bo‘lmagan. Faqatgina film suratga olishga moliyaviy imkonimiz bo‘lmagani uchun ijtimoiy tarmoqlarga video suratga olishni boshlaganmiz. Orzularim juda ko‘p, faqat Instagram bilan cheklanib qolish niyatim yo‘q, — deydi Bobur Mansurov.
Ijodkor nima sababdan jamoasiga yangi a’zo olmasligining sabablarini ochiqladi.
— Jamoamiz beshta kursdosh do‘stimdan tashkil topgan. Deyarli to‘qqiz yildan beri bir-birimizni yaxshi bilamiz. Ammo ba’zi vaqtlarda hamma a’zolarning o‘ziga rol topolmay qolamiz. “Jamoangizga qabul qiling”, deb kelayotganlar ko‘p. Ammo hozircha jamoani kengaytirish niyatimiz yo‘q. Keyinchalik media jamoasini tashkil qilib, yangi yigit-qizlarni taklif qilarmiz, — deydi Bobur Mansurov.
Izoh (0)