Karyerasini o‘n yillar oldin boshlagan ko‘plab aktyorlar hali ham ijod qilmoqda, biroq ularning ba’zilari mashhurlikdan zerikib, boshqa yo‘ldan borishga qaror qilishdi. Bir paytlar o‘z davrining eng jozibali aktyorlaridan biri hisoblangan Mikki Rurk kinodagi karyerasini tashlagani uchun hozirda bundan afsuslanadi.
Gollivudning eng kelishgan aktyori
80-yillarning boshlarida Mikki Gollivudning eng jozibali aktyorlaridan biri hisoblangan. U “Mayxona” (1982), “Jangari baliq” (1983) va “Grinvich qishlog‘i papasi” (1984) kabi filmlarda rol o‘ynaydi va barchaning e’tiborini tortadi. Kelishgan qomati va jozibasi tufayli Mikki ko‘plab ayollarni o‘ziga maftun etadi. Biroq uning shon-shuhrati juda qisqa umr ko‘radi.
Keyingi o‘n yil ichida aktyor tez-tez kino sanoatini mensimasligi haqida gapiradi. 1992-yilda bergan intervyusida u shunday deb tan oladi:
“Siz faqatgina kino va jamiyatga tegishli ekanligingizni bilasiz. Shunday qilib, sakkiz yil ichida o‘zingizni asta-sekin yo‘qotasiz”.
Mikki boshqa yo‘nalishdan ketadi
1991-yilda Rurk karyerasini 180 darajaga o‘zgartirishga qaror qiladi. U hayotidagi ilk ishtiyoqlaridan biri – boksga qaytish zaruratini his qiladi. Boks uning uchun o‘ziga xos himoya, Gollivud bosimidan qutulish yo‘lidek tuyuladi.
Ringga chiqqanidan keyin bir necha yil o‘tgach, Rurk katta muvaffaqiyatsizliklarga duch keladi, natijada karyerasini yo‘qotadi. Janglar davomida u ko‘plab jarohatlar oladi. Mikki hatto boksni davom ettirsa, miyasiga doimiy shikast yetishi haqida ogohlantiriladi
Muxlislar Rurkning qiyofasidagi o‘zgarishlarni sezmay qolishmaydi. “Yovvoyi orxideya” filmining ayrim sahnalarida aktyorning yonoqlari shishib ketgani tomoshabinlarda implantat borligidan shubhalanishga sabab bo‘lgan. Mikki bu da’volarni rad etadi va shish paydo bo‘lishi stomatologik operatsiyadan keyingi ta’sirlardan kelib chiqqanligini tushuntiradi, ammo muxlislar bu gaplarga ishonishmaydi.
Xavfli natijaga olib kelgan plastik jarrohlik
1990-yillarda Mikkining obro‘si keskin pasayadi. U umidli yosh iste’dod o‘rniga fojiali shaxsga aylanadi va ish topishda qiynaladi.
“Taxminan 10 yil oldin faoliyatim to‘g‘ri yo‘nalishda ketayotgan edi, — deydi u. — Ammo keyin suratga tushishni to‘xtatdim, o‘zimni yoqtirmay qoldim. Men asta-sekin o‘zimni ichimdan yo‘q qilardim. Nazarimda, endi o‘zimga tegishli emasdim va kinoda muvaffaqiyat qozonganim uchun o‘zimni aybdor his qilardim”.
2009-yilda Mikki muvaffaqiyatsiz operatsiya qilingan yuzi haqida gapirib beradi. U shunday deb tan oladi:
“Men buni asosan boksdan orrtirgan jarohatlarimni tuzatish uchun qildim, ammo yomon jarrohga uchrab qoldim”.
“Kurashchi” filmi muvaffaqiyati va “Oskar” mukofotiga nomzodlikdan so‘ng Mikki Rurk kinoga g‘alaba bilan qaytadi. Ammo, afsuski, aktyorning qiyinchiliklari shu bilan tugamaydi. U “Temir odam 2” superqahramonlik filmidagi rolidan keyin hafsalasi pir bo‘ladi. Rurkning ta’kidlashicha, uning aksariyat ishlari sahna ortida qolgan. Mikki boshqa loyihalarda faqat moliyaviy sabablarga ko‘ra suratga tushadi.
“Yana o‘zimni yoqtira boshladim”
2017-yilda u ijtimoiy tarmoqlarga qo‘ygan suratiga shunday izoh yozadi: “Endi men yana kelishgan erkakman. Yana bittasi qoldi”. Ehtimol, Rurk o‘zining so‘nggi jarrohlik operatsiyasiga shunday shama qilgan bo‘lishi mumkin.
Mashhur Gollivud aktyoridan faqat pushaymonlik bilan to‘la odamga aylangan Mikki Rurkning taqdiri shon-shuhrat keltiradigan xavf-xatarlar, shuningdek, o‘zidan qoniqmaslik asosida tanlov qilish oqibatlariga misoldir. Har qanday qiyinchilikka qaramay, Mikkining taqdiri to‘g‘ri yo‘lga qaytish uchun hech qachon kech emasligini eslatib turadi.
Izoh (0)