Tomoshabinlarga “Qor qo‘ynida lola”, “O‘tov “ va “Jannat qaydasan” filmlaridagi rollari bilan yaxshi tanish bo‘lgan aktrisa Zamira Beshimova “Daryo”ning YouTube’dagi kanalida intervyu berdi. U intervyu chog‘ida otasiz ulg‘aygani, moddiy qiyinchiliklari va unga berilgan nojo‘ya takliflar haqida so‘zlab berdi.
— Bolaligimda oilamdagi muhitni muammodek qabul qilar va bundan qattiq o‘ksinar edim. Gap shundaki, otamning kim ekanini bilmasdan, uning mehrini tuymasdan katta bo‘lganman. Otam bilan bog‘liq faqatgina bitta xotiram bor. Otam betob bo‘lgani uchun faqat kasalxonada davolanardi. Olti yoshimda onam bilan uni ko‘rgani borganmiz. Men sal narida o‘ynab o‘tiribman, ota-onam nimalarnidir gaplashishyapti. Shunda tasodifan “Bolani kasalxonaga olib kelma, yuqib qolishi mumkin, deyishyapti”, degan gap qulog‘imga chalingan. Shundan keyin otam bilan qaytib uchrashmaganmiz. Oradan ko‘p vaqt o‘tmay otamdan ayrilganimni aytishgan. Bobomning uyida otamning katta portreti bo‘lardi. Unga qarab otamning qanday ko‘rinishda ekanligini bilganman. Keyinchalik, bilsam, otam rahmatli sil kasaliga chalingan ekan, — deydi Zamira Beshimova.
Aktrisa ikki farzandni yolg‘iz tarbiyalash onasiga qiyin kechgani, moliyaviy qiynalgani va maktab formasini olishga ham imkoni bo‘lmagani haqida so‘zlab berdi.
— Bolaligim mustaqillikning ilk yillariga to‘g‘ri kelgan. U davr moliyaviy qiyinchiliklari bilan ko‘pchilikning yodida qolgan bo‘lsa ajabmas. Onamni qisqartirishlar sabab ishdan bo‘shatishgandan keyin ro‘zg‘orimizda tanglik sezilgan. Hatto, yeyishga nonimiz qolmagan kunlari ham bo‘lgan. Hech yodimdan chiqmaydi ayni o‘smirlik chog‘imda erta-indin o‘quv yili boshlanadigan kunlar edi. Hamma dugonalarim yangi kiyimlar oldirishgan, ammo onam maktab formasi ham olib berolmagan. Ilojsizlikdan onamning ko‘ylagining o‘lchamini o‘zimga moslab, maktabga kiyib borganman. U paytlarda onamni tushunmaganman. Yoshim ulg‘ayib, ona bo‘lganimdan keyin o‘sha vaqtda onamga qanchalik qiyin bo‘lganimni his qildim, — deydi aktrisa Zamira Beshimova.
Zamira Beshimova ba’zi rejissorlar tomonidan nojo‘ya takliflar unga ham bo‘lgani va u hamkasblariga bunday vaziyatlarda qanday yo‘l tutish kerakligi haqida so‘zlab berdi.
— Afsuski, ko‘p qizlar kino olamiga alam bilan kirib kelishadi. “Qanday bo‘lsa ham mashhurlikka erishaman. Mashhur bo‘lib olsam hamma muammolarim o‘z yechimini topadi”, deb o‘ylashadi. Hatto, ba’zi qizlar ochiqdan-ochiq “homiy” qidirishlarini ham tan olishadi. Bu aslida ijod emas, buni tijorat deb ta’riflasak ham bo‘ladi. Siz biron-bir buyumni sotmoqchi bo‘lsangiz, avval uni ozgina reklama qilasiz. Qiz va ayollar o‘zini oshirib-toshirib ko‘rsatishi ham shunga o‘xshash jarayon. Buni asl san’at bilan qiyoslash kerak emas. Afsuski, bunday taklif nafaqat san’at sohasidagi, balki boshqa sohaga ham endi kirib kelayotgan yosh va chiroyli qizlarga beriladi. Menga ham bunday takliflar bo‘lgan, shu sababdan ham juda ko‘p rollar nasib etmagan. Ammo bunday jirkanch takliflarga rozi bo‘lib, mashhurlikka erishgandan ko‘ra uni rad etgan yaxshiroq, — deydi aktrisa Zamira Beshimova.
Suhbatni to‘liq holda quyida tomosha qilishingiz mumkin:
Izoh (0)