“Sen bilan faxrlanaman” — Shavkat Mirziyoyev Garvard universitetiga 100 ming dollarli grant asosida o‘qishga kirgan talabaga rahmat aytdi

Samarqandlik Shodiyor Abduvoitov 22 yoshida dunyodagi eng nufuzli oliygohlaridan biri Garvard universitetiga o‘qishga kirdi. Bu haqda “O‘zbekiston 24” telekanalining “Menimcha” ko‘rsatuvida maʼlum qilindi.

24-avgust kuni prezident Shavkat Mirziyoyev Samarqand viloyatiga tashrifi chog‘ida Oqdaryo tumanidagi 32-maktabda bo‘lgan va o‘sha yerda Shodiyor bilan ham muloqot qilgan.

“Singapur menejmentni rivojlantirish institutini tamomladim va hozirda Garvard universitetiga o‘qishga kirdim. Universitet menga 100 ming dollarli grant ajratdi. “El-yurt umidi” jamg‘armasi esa yo‘lkira, yotoqxona va oziq–ovqat xarajatlarimni qoplab berarkan”, — degan Shodiyor davlat rahbariga.

Shavkat Mirziyoyev esa talaba bilan suhbatda: “Sen bilan faxrlanaman, g‘ururlanaman, ota-onangga nomimdan rahmat deb qo‘ygin”, — deya uni ruhlantirgan.

Muxbir bilan suhbatda Shodiyor bir vaqtning o‘zida 100 tadan ortiq universitetga qabul qilingani va Garvardni tanlaganini taʼkidlagan.

“Albatta, bu Oqdaryoning chekka bir hududida tahsil olgan yosh uchun katta natija deb hisoblayman”, — degan u.