Maktabgacha va maktab taʼlimi vazirligi 2023/2024-o‘quv yili boshlanishi munosabati bilan bog‘chalarda “Salom, bog‘cha”, maktablarda “Birinchi qo‘ng‘iroq”, “Mustaqillik darsi” tadbirlarini o‘tkazish bo‘yicha tavsiya hamda namunaviy ssenariy ishlab chiqdi.
Unga ko‘ra, maktablarda 4-sentabr kuni soat 8:00 da “Birinchi qo‘ng‘iroq” tadbirlari “Yangi hayot uchun, yangi O‘zbekiston uchun” shiori ostida o‘tkaziladi.
O‘quvchilar xavfsizligini ta’minlash maqsadida tadbirni 1 va 11-sinf o‘quvchilari ishtirokida o‘tkazish, maktabdagi o‘quvchilar soni va tadbir o‘tkazish joyi hisobga olinib, qolgan sinf o‘quvchilarini tadbirga jalb etish lozim.
Tadbir maktab hovlisi, bog‘i, soya-salqin ochiq maydonlarda o‘tkazilishi, o‘quvchilar xavfsizligi ta’minlanib, maktab hududiga avtotransport vositalari kiritilmaslik choralari ko‘rilishi kerak.
Tadbir ishtirokchilari, ayniqsa, 1-sinf o‘quvchilarini charchatib qo‘ymaslik maqsadida tadbir davomiyligi 45 daqiqadan ortiq bo‘lmasligi tavsiya etiladi.
1-sinf o‘quvchilariga “Prezident sovg‘asi” mahalliy hokimliklar, o‘zini o‘zi boshqarish organlari, ota-onalar ishtirokida topshiriladi.
“Birinchi qo‘ng‘iroq” chiroyli, ko‘tarinki ruhda, bayramona o‘tkazilishida joylardagi mahalliy hokimliklar, o‘zini o‘zi boshqarish organlari, ota-onalar, kasaba uyushmasi, mahalla va hamkor tashkilot vakillari jalb etilishi mumkin.
4—5-sentabr kunlari maktabgacha taʼlim tashkilotlarida “O‘zbekiston — mening Vatanim” mavzusida ochiq mashg‘ulotlar tashkil etiladi.
“Mustaqillik darsi” mehnat faxriylari, faxriy o‘qituvchilar, davlat mukofotiga sazovor bo‘lganlar va taniqli sportchilar ishtirokida tashkil etish tavsiya etiladi.
Izoh (0)