Ozarbayjonda o‘zbek modeli asosida ipakchilik rivojlantiriladi. Bu haqda “O‘zbekiston 24” telekanalining “Menimcha” ko‘rsatuvida maʼlumot berildi.
Ko‘rsatuv uchun intervyu berarkan, “O‘zbekipaksanoat” uyushmasi raisi Olimjon Jumayev bundan 6 yil ilgari o‘zbek ipakchilari xorijda korxona ochishi murakkab masala bo‘lganini eslagan.
“Pillachilik ijtimoiy soha. Chunki pillachilikda asosan aholining kambag‘al qatlami ish bilan band bo‘ladi. Bugungi kunda O‘zbekistonda 1,2 million nafarga yaqin odam pillachilik tarmog‘ida ish bilan band. Shu nuqtayi nazardan Ozarbayjonning 7 ta tumanida o‘zbek modeli asosida pilla yetishtirish, uni qayta ishlash amalga oshirilmoqda.
2017-yilda O‘zbekistondagi birorta korxona ipakchilari boshqa davlatlarga borib korxona ochadi yoki 100 foiz o‘zbek investitsiyasi asosida qo‘shma loyihalarni amalga oshiradi desak hech kim ishonmagan bo‘lardi”, — dedi u.
Ozarbayjonlik tadbirkor Fozil Hummatovning taʼkidlashicha, o‘zbek ipakchilaridan o‘rganadigan jihatlar ko‘p.
Ozarbayjonda pillachilik ancha susayib, rivojlanishdan ortda qolgandi. O‘zbekistonda esa aksincha, tarmoq ancha oldinda. O‘zbekistonlik hamkorlar ko‘magida ushbu yo‘nalishni yurtimizda rivojlantrish niyatidamiz.
Shu yilning fevralida ipakchilik yo‘nalishida korxona ochdik. Oz vaqt bo‘lsa-da, erishilgan natijamiz bor. 20 gektar yer maydonida pillachilikda ozuqa manbasi bo‘lgan tut plantatsiyalari joriy qilinmoqda. Shu paytgacha bu ozuqa manbalari Ozarbayjonga Xitoydan olib kelinardi. Xarajatlar katta edi. Endi o‘zbek tajribasi asosida tut plantatsiyalari tashkil etilmoqda.
Keyingi yili esa huddi O‘zbekistondagi kabi tayyor ipak mahsulotlari ishlab chiqarish yo‘lga qo‘yiladi, — dedi u.
Izoh (0)