“Сен билан фахрланаман” — Шавкат Мирзиёев Гарвард университетига 100 минг долларли грант асосида ўқишга кирган талабага раҳмат айтди

Самарқандлик Шодиёр Абдувоитов 22 ёшида дунёдаги энг нуфузли олийгоҳларидан бири Гарвард университетига ўқишга кирди. Бу ҳақда “Ўзбекистон 24” телеканалининг “Менимча” кўрсатувида маълум қилинди.

24 август куни президент Шавкат Мирзиёев Самарқанд вилоятига ташрифи чоғида Оқдарё туманидаги 32-мактабда бўлган ва ўша ерда Шодиёр билан ҳам мулоқот қилган.

“Сингапур менежментни ривожлантириш институтини тамомладим ва ҳозирда Гарвард университетига ўқишга кирдим. Университет менга 100 минг долларли грант ажратди. “Эл-юрт умиди” жамғармаси эса йўлкира, ётоқхона ва озиқ–овқат харажатларимни қоплаб бераркан”, — деган Шодиёр давлат раҳбарига.

Шавкат Мирзиёев эса талаба билан суҳбатда: “Сен билан фахрланаман, ғурурланаман, ота-онангга номимдан раҳмат деб қўйгин”, — дея уни руҳлантирган.

Мухбир билан суҳбатда Шодиёр бир вақтнинг ўзида 100 тадан ортиқ университетга қабул қилингани ва Гарвардни танлаганини таъкидлаган.

“Албатта, бу Оқдарёнинг чекка бир ҳудудида таҳсил олган ёш учун катта натижа деб ҳисоблайман”, — деган у.