Samarqand shahridagi Prezident maktabining 311,8 million so‘mlik davlat xaridi bekor qilingani haqida xabar berilgan edi. Ixtisoslashtirilgan ta’lim muassasalari agentligi holatga tushuntirish berdi.
Unga ko‘ra, Samarqand shahridagi Prezident maktabi buyurtmachiligida etender.uzex.uz maxsus axborot portaliga 2023-yil 28-iyul kuni qiymati 311,8 million so‘mlik “Maktab formalari xarid qilish” yuzasidan e’lon berilgan.
Ushbu tanlovda ikkita tadbirkorlik subyekti ishtirok etgan bo‘lib, mazkur davlat xaridi bo‘yicha xarid komissiyasining 2023-yil 5-avgust kunidagi eng yaxshi taklifni tanlash bo‘yicha elektron shaklda imzolangan bayonnomasiga ko‘ra ularning biri tanlov g‘olibi, ikkinchisi esa zaxiradagi g‘olib deb topilgan.
Ushbu davlat xaridlarida “Davlat xaridlari to‘g‘risida”gi qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 46-moddasi (davlat xaridlari jarayonidagi cheklovlar) hamda Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi qarori bilan tasdiqlangan nizomning bir qator talablariga amal qilinmagan.
Xususan, ushbu xaridlarda ishtirok etgan talabgorlarning hujjatlari xarid komissiyasi a’zolari foydalangan qurilmalar (IP-manzillari bir xil) orqali elektron platformaga yuklangan. Mazkur holatlar bo‘yicha Ixtisoslashtirilgan ta’lim muassasalari agentligi tomonidan Samarqand shahridagi Prezident maktabi xodimlariga nisbatan xizmat tekshiruvi o‘tkazilib, tanlov bayonnamasi bekor qilindi hamda aniqlangan kamchiliklarga yo‘l qo‘ygan mas’ullarga nisbatan intizomiy jazo chorasi qo‘llandi.
Izoh (0)