“Chorvachilikda identifikatsiya qilish tizimi va naslchilik sohasini takomillashtirishga oid qo‘shimcha chora-tadbirlar to‘g‘risida”gi prezident qarori qabul qilindi.
Qarorga muvofiq Qishloq xo‘jaligi vazirligi hamda Iqtisodiyot va moliya vazirligining Veterinariya va chorvachilikni rivojlantirish qo‘mitasi huzurida davlat muassasasi shaklida Hayvonlarni identifikatsiya qilish, ro‘yxatga olish va kuzatish markazini tashkil etishga ruxsat berildi.
Qaror bilan Veterinariya va chorvachilikni rivojlantirish qo‘mitasiga Toshkent shahar Mirzo Ulug‘bek tumani, “Ijodkor” MFYda joylashgan Identifikatsiya markazini ko‘chirish va joylashtirish uchun xususiy mulk sotib olish, ta’mirlash, yangi bino va inshootlar qurish hamda laboratoriya asbob-uskunalari va jihozlarni xarid qilish xarajatlarini qo‘mita huzuridagi Veterinariya xizmati va chorvachilikni rivojlantirish jamg‘armasi hisobidan 50 million so‘mgacha miqdorda moliyalashtirishga ruxsat berildi.
Veterinariya va chorvachilikni rivojlantirish qo‘mitasiga Identifikatsiya markazini joylashtirish uchun bino va inshootlarni qurish hamda ta’mirlash ishlarini tendersiz amalga oshirishga ruxsat berildi.
Shuningdek, qarorga muvofiq 2023-yil 1-dekabrdan boshlab chorvachilik xo‘jaliklari o‘z ehtiyoji uchun import qilgan nasldor qoramollarga hisoblangan qo‘shimcha qiymat solig‘ini Veterinariya va chorvachilikni rivojlantirish qo‘mitasi kafolati asosida 180 kun ichida to‘lab berish tizimi joriy qilinadi.
Bundan tashqari, 2023-yil 1-sentabrdan boshlab, 2025-yil 31-dekabrga qadar davlat tomonidan chorvachilik mahsulotlarini yetishtiruvchi xo‘jaliklarga xorijiy davlatdan import qilingan nasldor qoramollarning har bir boshiga 2 million so‘mdan, nasldor qo‘y va echkining har bir boshiga 400 ming so‘mdan, parrandachilik xo‘jaliklariga har bir bosh bir kunlik nasldor jo‘jani import qilish bilan bog‘liq xarajatlarning 15 ming so‘mini qoplash uchun subsidiyalar ajratiladi.
Eslatib o‘tamiz, “Raqamli O‘zbekiston — 2030” strategiyasini tasdiqlash va uni samarali amalga oshirish chora-tadbirlari to‘g‘risidagi prezident farmoniga ko‘ra, O‘zbekistonda barcha jonivorlar (yirik va mayda shoxli qoramollar, cho‘chqalar, otlar, eshaklar va tuyalar, shuningdek, kuchuk va mushuklar) bosqichma-bosqich identifikatsiya qilinib, yagona elektron axborot tizimiga kiritiladi.
Hayvonlarga quloq uchun birka (yirik va mayda shoxli qoramol, tuya va cho‘chqalarda), tavro yoki kleyma (ot va eshaklar), jetonlarda (kuchuk va mushuklar) aks ettiriluvchi individual raqam beriladi. Identifikatsiya olish shartnomaga asosan pulli tartibda amalga oshiriladi.
Izoh (0)