Самарқанд шаҳридаги Президент мактабининг 311,8 миллион сўмлик давлат хариди бекор қилингани ҳақида хабар берилган эди. Ихтисослаштирилган таълим муассасалари агентлиги ҳолатга тушунтириш берди.
Унга кўра, Самарқанд шаҳридаги Президент мактаби буюртмачилигида etender.uzex.uz махсус ахборот порталига 2023 йил 28 июль куни қиймати 311,8 миллион сўмлик “Мактаб формалари харид қилиш” юзасидан эълон берилган.
Ушбу танловда иккита тадбиркорлик субъекти иштирок этган бўлиб, мазкур давлат хариди бўйича харид комиссиясининг 2023 йил 5 август кунидаги энг яхши таклифни танлаш бўйича электрон шаклда имзоланган баённомасига кўра уларнинг бири танлов ғолиби, иккинчиси эса захирадаги ғолиб деб топилган.
Ушбу давлат харидларида “Давлат харидлари тўғрисида”ги қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 46-моддаси (давлат харидлари жараёнидаги чекловлар) ҳамда Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги қарори билан тасдиқланган низомнинг бир қатор талабларига амал қилинмаган.
Хусусан, ушбу харидларда иштирок этган талабгорларнинг ҳужжатлари харид комиссияси аъзолари фойдаланган қурилмалар (ИП-манзиллари бир хил) орқали электрон платформага юкланган. Мазкур ҳолатлар бўйича Ихтисослаштирилган таълим муассасалари агентлиги томонидан Самарқанд шаҳридаги Президент мактаби ходимларига нисбатан хизмат текшируви ўтказилиб, танлов баённамаси бекор қилинди ҳамда аниқланган камчиликларга йўл қўйган масъулларга нисбатан интизомий жазо чораси қўлланди.
Изоҳ (0)